Diyarname
Malpereke kurd gotiye: "Gelo wê BDP di derbarê Bengi Yildiz de çi biryarê bide?" Em jî dibêjin ji te re çi?!
Emê di vê nivîsê de li ser vê meseleyê rawestin:
Mebûsê BDP'ê yê Batmanê Bengî Yildiz li Bodrûmê di betlaneyê de wêneyên wî û yê jineke (miheqeq hin wêneyên din jî hene, lê ev derxistine pêş) kişandin û weşandin. Rojnameya ku weşandiye rojnameyeke tirkan TAKVİM e. Piştî vê hin rojnameyên din ev weşandin. Takvim wisa rojnameyeke ku hem tiştên magazînî diweşîne, hem jî her tiştê li dijî kurdan, bi awayê herî tûj.
Takvim tişteke dijî kurdan biweşîne tişteke normal e lê malpereke kurdan, ya bi kurdî bi navê AVESTAKURD vê biweşîne, bêyî ku cih bide gotinên Bengî ne tişteke normal e.
Bengi Yildiz di 17'ê vê mehê de li Bodrûmê bûye. Û wêne, wê demê hatine kişandin, piştî çend rojan di çapemeniya tirk de hatin weşandin. AVESTAKURDÊ di 26'ê vê mehê de ev nûçe weşand:
NÛÇEYA AVESTAKURDÊ
"Avestakurd - Parlamenterê Kurd yê Batmanê Bengi Yildiz li Bodrumê bi jinekê re hate dîtin.
Bengi Yildiz got, ew geşteke malbatî bû. Lê belê jina wî ji medya Tirkiyê re axifî û got ew ne geşteke malbatî bû û ew wê jina bi hevserê wê re nas nake.
Ev çend rojin medyaya Tirk li ser Bengi Yildiz dinivisîne û dibêje ku ew li Bodrumê bi jinekê re bû û ew jin jî ne jina wî bû.
Heta niha BDP tu daxuyaniyeke fermî nedaye, lê belê ew li bendê ne ku Yildiz bi xwe di derbarê wê bûyerê de tiştekî aqilane bibêje û daxuyaniyekê bide.
Bengi Yildiz yek ji wan kesên radîkal dihate naskirin û gelek caran bi keviran êrîşî polîsan kiribû.
Li aliyê din rojnameya Batman Post li Batmanê derdikeve nivîsand ku xelkê Batmanê ji dîtina Bengi Yildiz bi awayekî dizî û veşartî bi jineke xerîb re nerazî ye û gelekî aciz e."
Pêşî, AVESTAKURD ji te re çi?
Dûre, ma tu nizanî her tiştê çapameniya tirk dinivîse ne rast e? Heta kengê hûnê her nûçeyên çapemeniya tirk bigirin û biweşînin?
Di nûçeya xwe de tu qala "Batman Postasi" kiriye. Ger bi rastî te "Batman Postasi" xwendibe, te çima cih neda gotinên Bengi Yildiz ku Yildiz li wir (roja 24.08.2011) li ser meseleyê axiviye?
Çapemeniya tirk helbet dixwaze dubendiyê bixe navbera mebûsan jî, malbatan jî, tu çi dixwazî?
GOTINÊN YILDIZ LI SER MESELEYÊ
Û vaye ji we re gotinên Yildiz ku di Batman Postasi de hatin weşandin (24.08.2011):
"Ji bo daweta dostekî malbata me ez çûm Bodrumê. Tevî wan em çûn behrê, behra ku her kes diçe. Em siwariya keştiya ku her kes siwar dibe bûn. Di birîna mehrê de ez şahid bûm. Lê di wêneyan de wekî ku têkiliyeke ne meşrû hebe, pêşkêşkirineke bêehlaqî hate kirin. Di nûçeyê de gotine 'cihê tirkên sipî'. Gelo em jî dibin 'kurdê sipî?' Ma emê neçin wê derê? Pêşkêşkirina nûçe û wêneyan derveyî ehlaqî ye. Wekî ku em di yatên (keştiyên buha yên dewlemendan) luks ên mîlyon lîrayan de jiyana xwe derbas dikin hatiye pêşkêş kirin. Ew keştî, keştiyeke gerê bû û 150 kes têde hebûn. Xwedî jî hevalekî me yê batmanî bû. Di wê keştiyê de 150 kes hene. Min tevî 150 kesî meqarne xwariye. Ev betlaneyeke malbatê bû."
Her wiha Yildiz li ser jina ku di wêneyan de pêre bûye jî wisa gotiye: "Navê wê jina di wêneyan de Deniz Uyan e. Temamê malbatê niha li cem min e û hemû jî li ser vê nûçeyê xemgîn bûn."
De fermo Avestakurd, tu yê ji bo vê agahiyê çi bibêjî?
Tu çima dikevî dû çapameniya tirk?
Çapemeniya tirk kengê tiştek baş li ser kurdan weşandiye?
Tuyê kengê tiştek baş biweşînî?
Em bibêjin hûn ji Bengi Yildiz hez nakin (hûn ne mecbûr in hez bikin), li gor etîka rojnamegerî qet nebe gotinên Yildiz jî bidin bila xwendevan ji xwe re bikeve nav nirxandineke.