Diyarname
Meclisa Aştiyê ya Tirkiyeyê bi beşdariya gelek nivîskaran li Stenbolê daxuyanî da çapemeniyê. Di civîna çapemeniyê de mebûsê BDP'ê Sirri Sureyya Onder got: "Ji bo aştiyê emê her tiştî bikin."

Meclisa Aştiyê ya Tirkiyeyê li ser mirina leşkeran, bombebarana bi ser Qendîlê de roja 18'ê mehê ber êvarkî li Salona Civînê ya Cezayîrê ji bo "Bilindkirina dengê aştiyê" daxuyanî da. Mebûsê BDP'ê Sirri Sureyya Onder, Hakan Tahmaz, Nuray Mert, Osman Kavala, Deniz Turkali, Murat Çelikkan, Feryal Oney, Aydin Çubukçu, Erol Katircioglu, Vedat Yildirim, Veysi Sarısozen, Ali Kenanoglu, Ahmet Tonak, Tayfun Mater û Ferda Keskin jî di nav de gelek kes beşdarî civînê bûn.

Endamê meclisê Hakan Tahmaz got ku di du salên dawî de bi qasî ku tu demê nehatibin cem hev mirovji bo aştiyê hatine ba hev, dengê "ji şer re êdî bes e" bilind kirine.

Tahmaz got ku hikumetê ev firsenda aştiyê nenirxandiye, "şer"ek ku dê berdêla wê gelek giran be îlan kiriye û çapemenî jî bêyî ku ji demên borî dersê bigire dîsa dest bi "zimanê şer" kiriye.

Hakan Tahmaz wisa got: "Tekane rêya rawestandina şer ev e hemû Tirkiyeye bibêje 'ev şer ne şerê min e, yê serdestan e'."

Sirri Sureyya Onder jî wisa got: "Me ji gel raye girt. Gel ji bo em wijdanê xwe li ciheke deynin û herin meclisê raye nedaye me. Li hemberî yên dibêjin 'Wê mecbûrî bên meclisê, wê gotina xwe daqurtînin bûn' em dibêjin ku em mafên xwe naxin bazarê. Serokwezîr nû ye, lê têkoşîna ji bo mafên civakî gelek kevn e . Ger me bigirin jî bila bigirin, emê ji bo aştiyê her tiştî bikin."

Di civînê de nivîskarên din jî axivîn û dîtinên xwe yên li ser aştiyê anîn ziman.