Diyarname

Li nav kurdan derxistina rojnameyeke bi kurdî û çapkirî gelek zehmet e. Lê tekane rojnameya bi kurdî ku hê jî weşana xwe ya çapkirî didomîne heye. Em qala rojnameya Xwebûnê dikin. Xwebûn li Bakur û Tirkiyeyê tekane rojnameya bi kurdî ye ku bi awayekî çapkirî derdikeve û belav dibe. Rojnameyê vê hefteyê dest bi serdema nû ya weşanê kir.

Piştî salên 90’î li Bakur û Tirkiyeyê bi rojnameya Welat, Welatê Me, Azadiya Welat serdema rojnameya bi kurdî geş bû. Ji van, rojnameya Azadiya Welat piştî salên dirêj ku heftane derket di sala 2006'an de veguherî rojaneyê. Heta bi biryara hikumeta Tirkiyeyê hat girtin jî wekî rojnameya rojname weşana xwe domand. Rojnameya Xwebûnê di berfanbara 2019’an li ser vê kevneşopiyê dest bi weşana xwe kir. Heta niha 147 hejmarên wê derketine û heftane weşana xwe bi awayekî peryodîk didomîne. Û niha dest bi serdemeke nû kir.

"XIZMETA ZIMAN Û RAGIHANDINA KURDÎ" 

Xwediyê Îmtiyazê yê rojnameya Xwebûnê Kadri Esen ji bo malpera me axivî. Ew dibêje, “Di xizmeta zimanê kurdî, ragihandina kurdî de em weşana xwe bidomînin.”

Di rojnameyê de nûçeyên siyasî, çandî, jin, hevpeyvîn û hwd. beş hene. Ligel van her hefte qunciknivîskarên wan jî hene ku di quncikên xwe de fikir û ramên xwe tînin ziman, bûyerên rojane dinirxînin.

Esen dibêje ku bi rojnameya çapkirî ew ji rojava kurdan bûyeran ragihînin, ligel vê yekê bi ser malpera xwe re jî rojane tiştinan belav dikin, dîsa tiştên di rojnameya kaxiz de belav kirine, piştî derketina rojnameyê bi ser malperê re jî radigihînin xwendevanan.

10 HEJMAR HATIN BERHEVKIRIN 

Rojname derdikeve lê heta niha rastî gelek astengiyan jî hatine. Li gor gotina Esen heta niha ji bo 3-4 manşetan ji bo îfadedayîne gazî wan kirine, di encamê de tenê yek doz vekirine û ew jî betal bûye. Her wiha rojnameger Kadri Esen dibêje ku heta niha nêzî 10 hejmarên wan hatin berhevkirin û paşê qala bûyera nû dike: “Meha borî gef li otobusan xwarin ku rojnameyên me nebin bajarên din. Li aliyê din çend meh berê 16 hevalên rojnameger hatin girtin, di nav de du xebatkarên me Mehmet Ali Ertaş û Zeynel Abidin Bulut jî hebûn. Dîsa wê demê dest danîn ser hin amûrên ku ji bo rojnameyê bikar tînin wekî kompîtur, makîne û hwd.”

JI 100'Î ZÊDETIR QUNCIKNIVÎSKAR 

Xwediyê rojnamegerê Esen li ser serdema nû û tiştên nû ku derketine holê jî wisa dibêje, “Me hejmara qunciknivîskarên xwe zêde kir. 16 nivîskarên nû li rojnameyê zêde bûn, bi vê re hejmara nivîskaran derket ser sedî, ku dor 102 kesî ye. Bernameyên me yên youtube ji ber derfetan sekinîbû ji nû ve me da dest pê kirin, bernameyên nû jî emê lê zêde bikin. Bi vî awayî emê xizmeta zimanê kurdî, ragihandina kurdî bikin.”

Xwediyê Îmtiyazê yê rojnameya Xwebûnê Kadri Esen dibêje ewê xizmeta ji bo zimanê kurdî bidomînin.