DiyarName.Com

Rojnameya Tarafê weşandina nûçeyên asparagas didomîne

Cemil Oguz

Rojnameya Tarafê ku berê jî der barê BDP'ê de nûçeyên asparagas weşandibûn bi nêzbûna hilbijartinê re careke din dest avêt vî karî. Wisa diyar e ku rojname ji niha de dixwaze serê mirovan tevlihev bike.

Vê carê nûçegîhanê Tarafê Burhan Ekinci (Ekinci berê di DİHA'yê de xebitiye û piştî vebûna Tarafê wekî gelek nûçegîhanên din ên kurd derbasê wir bû) nûçeyeke li ser BDP'ê ku dê kî wekî berendamên serbixwe nîşan bide nûçeyeke amade kiriye (25.02.2011).

Sernavê "BDP'de bagimsim adaylar hazir' (Berendamên BDP'ê yên serbixwe amade ne) bikar aniye.
Dema mirov baş li nûçeyê dinêre mirov dibîne ku hin texmîn hatine kirin, ku her kesê li kolanê vê dikare texmîn bike. Lê hin deran jî bi taybetî ji bo serî tevlihevkirinê hatiye amadekirin.

Taraf ku di hilbijartinên din de jî (mînak di Referandûmê de) tiştên wisa kiribû careke din rola xwe dilîze.

Di vê serdema hilbijartinê de em jî bi navenda BDP'ê re, bi kesên eleqedar re axivîn. Bi gotineke din agahiyên li ser hilbijartinê li ber destên me jî hene.

Em ji nûçeya Tarafê mînakan û rastiya wan bidin.

Nûçe dibêje li bajarên wekî Îdir, Qers, Dêrsim, Çewlig, Bedlîs, Sêrt, Elezîz, Agirî, Erdaxan, Semsûr, Enqere, Îzmîr, Entab, Konya, Mêrsîn û Edene.
Di vir de hin rastî hene lê şaşî jî hene. Mînak li bajarên wekî Îzmîr û Enqereyê BDP ne yek diduyan dê wekî berendam nîşan bidin.

Taraf dibêje ku li bajarên wekî Batman, Şirnex, Culemêrg, Mêrdîn, Mûş û Rihayê dê du berendam bêne nîşandayîn. Li Stenbolê 3 berendam li Amedê jî 4 berendam bêne nîşandayîn. Ji bo bajarên ku didu tê gotin Tarafê texmîneke rast kiriye lê ji bo Stenbol û Amedê ne rast kiriye. Ji vir jî diyar dibe ku nûçeyeke xeyalî ye. Li navendê niha ev tê nîqaşkirin; Li Stenbolê li gor serjimariyê hejmara mebûsan zêde bûye lewre ji bo Stenbolê nîşandayîna wekî 4 an 5 berendaman tê axaftin.

Li Amedê jî dîsa mebûsek zêde bû û niha wekî cara din ne nîqaşa 4 berendam, nîqaşa nîşandayîna 5 berendaman li dar e. Di van her du bajaran de jî Tarafê daye navê.

Yek ji tiştên ku zêdetir daye navê de jî nîqaşa navên ku dê bêne nîşandayîn.
Nûçeyê navê hevserokên BDP'ê ku teqez wê bêne nîşandayîn daye ku jixwe ev ne meseleya nîqaşê ye. Bi vê dike ku nûçeya xwe xurt bike. Û hin navên din gotine, mînak Cengiz Kapmaz, Mustafa Avci, keça Orhan Dogan Ayşegul Dogan, Esat Canan, Dogan Erbaş, Kemal Avci, Demir Çelik, Leyla Guven û Nazmi Gur.

Divê ez bibêjim ku li gor agahiyên ku min girtine hin ji van navan ne rast in ku nûçegîhan pekandiye. Ez naxwazim navan bidim lê yek jê ezê bidim: Kemal Avci.
Piştî nûçe derket bi rojekê, di 26'ê mehê de ez li Enqereyê bûm. Kemal Avci ji zûde ye hevalê min e û bi salan şêwirmendiya çapemeniyê ye partiyê kir. Bi Avci re me xeber da, wisa dibêje: "Berendamtiya çi? Der barê min de ne di nav partiyê de nîqaşeke wisa çêbû, ne jî ez li benda tişteke wisa me. Bi ya min ev nûçe ne nûçeyeke niyetbaş e. Di nav partiyê de hê nîqaşa dê kî bibe berendam jî dest pê nekiriye. Binûçeyên wisa dixwazin zûtir nîqaşa berendamtî çêbe û partî enerjiya xwe ne ji bo cihên din ji bo vê derê xerc bike. Dixwazin li nav partiyê nîqaş çêbin. Min ji nûçegîhan xwest nûçeyê sererast bike lê nekir."

Tarafê ku di hilbijartinên borî de dixwest serê hilbijêrên kurd û siyasetmedarên kurd tevlihev bike, di hilbijartina pêşiya me de jî ji niha de ketiye ser rêya xwe, ji niha de navan pêşkêş dike û dixwaze serê mirovan tevlihev bike.
Bi gotina dawî: Taraf 'taraftî'ya (alîgirî) xwe didomîne.

Wekî nîşe: Hin malperên kurdan jî nûçeyên wisa digirin û diweşînin. Ev nûçeya navborî ji aliyê hin malperên kurdan ve hate weşandin.