Diyarname
Wêneyeke "Loda Kayê" ji bo kurdekî belkî nake pênc pereyan. Mirov wêneyekî loda kayê bikişîne û bide kurdekî dê bi mirov henekên xwe bike. Lê li dinyayê rewş diguhere. Wêneyê wênesazê fransiz Claude Monet ê bi navê "Meules" (Loda Kayê) derxistin mezatê û wêne bi 110.7 mîlyon dolarî hat firotin.
Li New Yorka DYA'yê (Dewletên Yekbûyî yên Amerîkayê) saziya bi navê Sotheby's 14'ê vê kehê mezat li dar xist. Di heşt deqîqeyan de tablo hat firotin. Heta niha tu tabloyek wî bi buhayeke wisa nehatibû firotin. Sotheby's eşkere nekir ku kî ev tablo kiriye.
Wênesaz Claude Monet di sala 1840'î de hatiye dinê û di sala 1926'an de miriye. Ew dema li gundê Giverny ku li ser sînorê Normandiya ye dijiya di sala 1890'î de ev tablo çêkiribû. Ji bilî ev tabloya "Meules" (Loda Kayê), li dor 25 tabloyên wî yên din ên li ser kayê çêkirine hene.