Duh li Almanyayê Konferansa Hevgirtina Rewşenbîrên Rojavayê Kurdistanê (HRRK) ya şaxê Ewropayê pêkhat. Di konferansê de komîteya nû ya rêveberiya şaxê Ewoupayê hate hilbijartin. Her wiha gelek mijarên din jî hatin guftugo kirin.

Duh li Almanya Konferansa Hevgirtina Rewşenbîrên Rojava ya şaxê Ewrupa hate lidarxistin. Yek ji damezrînerê rêxistina Yekîtiya Rewşenbîran Helîm Yûsiv di derbarê pêkanîna konferansê de ji RojNews re axivî. Yûsiv da zanîn ku Konferansa Şaxê Ewropa ya Komeleyê di sala 2018’an de li Ewropa pêkhat û wiha domand; “Pêwîst bû her du sal carek ev konferans pêkbihata. Lê ji ber hinek rewşên taybet, me biryar da em bi awayek awarte konferansê lidarbixin. Armanca me ya konferansê ew e carek din rewşenbîrên Rojava û endamên komeleyê yên li Ewropa kom bibin.”

Beşdarvana konferansê Evîn Mehmud jî di derbarê girîngiya konferansê de axivî û got; “Di konferansên bi vî awayî de nivîskar dikarin zêdetir hev nas bikin û karên xwe pêşkêkş bikin. Ji bo wê ev konferans ji bo me gelek girîng e.”

Endama HRRK'ê Şadiye Osman jî di derbarê pêkhatina konferansê ku ev cara yekem e ew tevlî konferansê dibe û wiha dom kir: “Konferansên bi vî awayî ji bo gelê kurd pêwîst in. Ji ber ku rewşa welatê me diyar e. Her çendî em di aliyê coxrafî de ji welat dûr bin jî, lê di aliyê rihî de em li gel êşên welat in. Ji ber ku rewşenbîr nûnerên êşên gelan in, konferansên bi vî awayî girîng in. Ez hêvîdarim rewşenbîrên me êşa gelê me bînin ziman.”

Komîteya nû hat hilbijartin

Di dawiya konferansê de Helîm Yûsiv, Zerdeşt Kal, Seydo Reşîd, Şadiye Xelo, Rêber Hebûn, Amitsî Krad û Cano Şakar wekî komîteya nû ya rêveberiya şaxa Ewropa hatin hilbijartin.

HRRK di sala 2004’an de li Siwêdê hatiye damezrandin. Endamên wê ji nivîskar û rewşenbîrên Rojavayê Kurdistanê pêk tên. HRRK kongreya xwe ya yekem di sala 2004’an de li Siwêdê pêkanîbû. Di konferansa 4’an de biryar hate girtin ku navenda yekîtiyê bibin rojavayê Kurdistanê. Kongreya pêncem di sala 2016’an de li rojavayê Kurdistanê pêkhatibû.