Diyarname

Weşanên Belkî ku navenda wê li Amedê ye du pirtûkên nû pêşkêşî xwendevanên xwe kir. Her wiha weşanxaneyê hejmara kovara xwe ya nû Çirûskê jîderxist.

'Beytik' bûn pirtûk

Pirtûka yekem ku ji Weşanên Belkî derketiye pirtûka helbestvan û muzîkar Yeqîn H. ye. Yeqîn H. ku ji bo malpera me jî nivîsan dinivîse bi yekem pirtûka xwe derket pêşberî xwendevarên xwe. Yeqîn H. helbest û muzîkê bi hev re dirêsîne, ziman diherikîne ber bi nav peyv û hevokan ve.

Ew du tehma muzîkê de helbestan dirêsîne, pir guh dide ahengê, lê gava ku ahenga helbestên xwe tûj dike, rêpîvanên helbestên yên wekî hêma, tema û lîrîzmê di ser guhê xwe re neavêje.

Yeqîn H. di helbestan de xwe li sînorên şevê diqelibîne.. Şev kurtasiya hemû helbestên wî ye, ji şevê têr nabe, her ku aciz dibe bi hêmaya şevê li ser şevê helbestek dinivîse, distrê. Şev, stran û helbest yek ji yekê delaltir in

Beytik / Yeqîn H. / Weşanên Belkiyê / Helbest

***

'A baş' xwendina çîrokan e

Pirtûka din ku ji Belkîyê derketiye jî yê Bahoz Baran a bi navê “A Baş” e. Pirs ev e: Di wêjeyê de gelo “a baş” kîjan e?

- A ku naşibe yên din, a ku me li dîmenên nuh difericîne, a ku me bi zimanekî din dihisîne, belê “a baş” ew e.

“A baş” pirtûkeke “îronîk” e. Gellek çîrokên vê pirtûkê ji ber îronîkbûna xwe “kenekî mizurr” li ser rûyê xwendevanê/a xwe pêk tîne.

Çîroknivîs, di çîrokeke xwe de wiha dibêje, “bêhna çîrokekê dihat pozê min”.

Çîroknivîs Bahoz Baran, ev pirtûk wekî kolleksiyoneke nêçîra çîrokan berhev kiriye. “A baş” hezkirina ji wêjeyê ye.

A Baş / Bahoz Baran / Weşanên Belkî / Çîrok, 79. rûpel

Çirûska 9'an

Her wiha Weşanên Belkî hejmara kovara xwe Çirûskê ya nûh jî derxist. Çirûska ku di bin edîtoriya Rênas Jiyan de derdikeve bi hejmara xwe ya 9'an derket pêşberî xwendevanên xwe.

Di vê hejmarê de Rênas Jiyan li ser "Aboriya Klasîk", Moran Ezdîn li ser "Di berhemên Dostoyevskî de Pirsgirêka Mirovahiyê", Bahoz Baran "Çewtiyên Çîroka Dema Bê 'a'ya Zêde" nivîsandiye.

Di kovarê de hevpeyvîn jî hatine weşandin. Yek ji wan bi Rêşad Songul re li ser çapemeniyê, ya din jî li ser muzîka metalê bi solîstê “Ferec”ê “Reh”î hatiye kirin.

Her wiha kesên wekî Berken Bereh, Feratê Dengizî, Konê Reş, Sînan Sutpak, Dr. M. Zanyar Akkuzu, Ar-da Janxwar, Mahsûm Çîçek, Lokman Ayebe, Şengul Ogur, Jan Ziryan, Bawer Rûken, Seydo Ozkan, Hesenê Metê, Bîşeng Xecê Pêşeng, Mirad Gundikî, Lokman Polat, Şivan Ar, Bargiran Şanaz, Latif Epozdemir û Melkan bi nivîsên xwe beşdarî kovarê bûne.

Ji bo kesên eleqedar:

E-mail: cirusko@hotmail.com
Navnîşan: Kooperatifler mah. Tren Yolu sk. Bağıran Apt. No: 1 Ofis-Diyarbakir
Tel&fakx: 0 90 412 224 47 72