Girê Spî
Di civîna MSD´ê de Rêveberiya Xweser a Bakur û Rojhilatê Sûriyeyê hat avakirin. Hevserokên nû Sîham Qiryo û Ferît Ette ye.
Di civîna Meclîsa Sûriyeya Demokratîk (MSD) de avabûna Rêveberiya Xweser a Bakur û Rojhilatê Sûriyeyê hat ragihandin. Sîham Qiryo û Ferît Ette jî ji bo Hevserokatiya Meclîsa Giştî ya Rêveberiya Xweser a Bakur û Rojhilatê Sûriyeyê hatin hilbijartin. Biryara avakirina rêveberiya xweser di civîna MSD ya di 16’ê Tîrmehê de hatibû stendin.
Hevseroka MSD’ê Emîne Omer, meclîsên sivîl ên Bakurê Sûriyeyê û pêşengên eşîran tevlî civînê bûn. Hevseroka MSD’ê Emîne Omer di civînê de axivî û got: “MSD’ê di konferansa xwe ya sêyemîn de pêşniyaz kiribû ku bila Rêveberiya Xweser a Bakur û Rojhilatê Sûriyeyê were avakirin. Armanca projeyê ev e ku, di navbera rêveberiyên xweser de ji bo koordîneyê pergaleke rêveberiyê were avakirin, valahiya rêveberî û ewlekariyê were tijekirin û Rojhilatê Sûriyeyê li gorî pergala rêveberiyê tevbigere ya ku berê li Bakurê Sûriyeyê hatibû avakirin.”
Piştî nîqaşên bi rêveberiyên xweser û meclîsên sivîl
Her wiha Omer derbirî ku ev rêveberî li herêmê îstîkrar ava kirine û wiha peyeyivî: “Di warê xizmetê de pêdivî bi cih anîne û karibûne herêmê li hemberî êrîşên terorîstan biparêzin. Ligel ku herêm ji hev dûr bûne jî, alîkarî dane hev û li hemberî terorê bi hev re li ber xwe dane.” Omer diyar kir ku piştî nîqaşên bi rêveberiyên xweser û meclîsên sivîl, biryar dane ku rêveberiya hevpar a Sûriyeya Bakur û Rojhilat ava bikin.
Ji 70 kesan pêk tê
Omer got ku wan tevî rêveberiyên xweser, meclîsên sivîl û meclîsên zagonsaz ji bo meclîsa giştî lîsteyek ava kirine ya ku ji 70 kesan pêk tê û wiha axivî: “Li ser vî esasî em MSD diyar dikin ku ev civîn, civîna pêşî ya Meclîsa Giştî ya Rêveberiya Xweser a Demokratîk a Bakur û Rojhilatê Sûriyeyê ye.”
Yek Suryan yek Kurd e
Ji Hevserokên Rêveberiya Xweser a Demokratîk a Bakur û Rojhilatê Sûriyeyê Sîham Qeryo Suryan û Ferîd Etî ji Kurd e.Piştî ku axaftinên di civînê de bidawî bûn, Sîham Qeryo ji pêkhateya Suryan û parêzer Ferîd Etî ji bjaarê Kobanê weke hevserokên Meclîsa Giştî ya Rêveberiya Xweser a Bakur û Rojhilatê Sûriyeyê hatin hilbijartin. Her wiha di civînê de 5 endamên Dîwana Giştî ya Meclîsa Giştî hatin hilbijartin.
Kordîneyê di navbera rêveberiyên Bakur û Rojhilat de
Piştî hilbijartinê, Hevseroka Meclîsa Giştî ya Rêveberiya Xweser a Bakur û Rojhilatê Sûriyeyê Sîham Qeryo di dawiya civînê de peyivî. Sîham Qeryo got ku rêveberiya nû dê bi hemû berpirsyarên xwe di qonaxa nû de rabe û dê kordîneyê di navbera rêveberiyên Bakur û Rojhilatê Sûriyeyê de pêk bîne.