Diyarname
Îro bi dronek êrîşê mala Serokê Herêma Kurdistana Federe Nêçîrvan Barzanî ya li Duhokê kirin. Dron li nêzî mala Barzanî ketiye û teqînek çêbûye. Hat gotin ku droneke din berî bikeve li hewayê îmha kirine.
Piştî vê êrîşê gelek peyamên piştgiriyê ji bo Barzanî hatin belavkirin.
Va ne ew peyam:
- Hevserokên DEM Partî Tuncer Bakirhan û Tulay Hatimogullari peyam şandin û got, "Em ev êrîşên li hemberî Duhok û Hewlerê yên ji aliyê hêzên Îranê ve hatine kirin bi tundî şermezar dikin. Em bombebarankirina mala rêzdar Nêçîrvan Barzanî jî şermezar dikin û em silametiyê ji Rêvebiriya Herêma Kurdistanê re dixwazin.
Di dawiya peyamê de Hevserokên DEM Partî gotiye, "Herêma Kurdistanê bi berdêlên gelek giran heta îro hatiye. Li hemberî zîhniyeta ku hewl dide erdnîgariya Kurdistanê bikişîne nav şer, wekî duh îro jî emê dijî wê, di nava piştgiriyê de bin û têkoşîna xwe bidomînin."

- Serokomarê Fransayê Emmanuel Macron êrîşa li mala  Barzanî bi tundî şermezar kir û piştevaniya welatê xwe dubare kir. Macron bi telefonê li Barzanî geriya ye.

Serokê YNK'ê (Yekîtiya Niştimanî ya Kurdistanê) Bafil Talabanî peyamek belav kir û êrîş bi tundî şermezar kir. Talabanî gotiye "Em ji bo diyarkirina kiryarên vê bûyerê û ji bo ku bê guman werin darizandin, daxwaza lêpirsîna hevpar dikin. Em amade ne ku bi her awayî ji bo vê pêvajoyê piştgiriyê bidin."
Talabanî gotiye gere em hemû bi hev re dijî kes an aliyan derkevin ku dixwazin rewşê aloztir bikin.
Cîgirê Serokwezîrê Herêma Kurdistanê Qubad Talabanî jî di peyama belavkiriye de gotiye, “Ev rewşeke metirsîdar e û em vê bi tundî şermezar dikin.”

- Serokwezîrê Iraqê Mihemed Şiya Sûdanî bi telefonê li  Barzanî geriya û êrîş şermezar kir. Sûdanî got ku biryar da ku ji bo lêkolînê komîteyeke hevbeş wê avakirin.

Serokê Tevgera Hîkmetê ya Niştimanî ya Îraqê Emar Hekîm, Serokê Partiya Serweriyê ya Îraqê Xemîs Xencer jî êrîş şermezar kirin. Li aliyê din KNK'ê (Kongreya Neteweyî ya Kurdistanê), KCK'ê ev êrîş şermezar kir.

Li Rojava jî bi ser 30'î re partî û saziyan daxuyaniya şermezarkirina vê êrîşê belav kir.

Ji bilî Hevserokên DEM Partî, di serî de Endama Heyeta Îmralî Pervin Buldan û gelek mebûsên DEM Partî peyama şermezarkirina êrîşê li ser hesabên xwe yên tora civakî belav kirin.

Siyasetmedar Leyla Zana jî peyamek belav kir û got, "Bi tundî êrîşa ser mala birêz Nêçîrvan Barzanî, serokê Herêma Kurdistanê ya li Duhokê şermezar dikim. Hemû hevsozî û piştgiriya xwe ji bo cenabê wî û gelê me li Herêma Kurdistanê nîşan didim. Di vê rewşê de, dilê me bi wan re ye û em ji Xwedê hêvî dikin gel û welatê me biparêze."

Serfermandarê Giştî yê HSD'ê Mazlum Ebdî jî di peyama xwe de bûyer şermezar kir û got, "Ewlehiya başûrê Kurdistanê berpirsiyariya her kesî ye û hizûra wê derê, hizûra hemû kurdan û herêmê ye."