Diyarname
Pirtûka çîrokan a nivîskar Bajar Mîrzeman bi navê "Evîntirş" ji Weşanên Belkiyê derket. Mîrzeman bi zimanekî helbestî çîrokên xwe nivîsandine.

Bajar Mîrzeman yekem pirtûka xwe derxist. Pirtûka çîrokan "Evîntirş" bi zimanê xwe yê helbestî balê dikişîne. Ji her çîrokê diyar e ku Mîrzeman li ser baş fikiriye, peyv yek bi yek nirxandiye, peyven zêde jê avêtiye û çîrokên xurt pêşkêş kiriye. Wî heta ku jê hatiye zor daye ziman, çîrokeke helbestî derxistiye holê. Ji her hevoka wî tehma helbestê difûre. Ewil "dilopek"ê diniqutîme, dûre dilopek din, ji wan dilopan gola çîrokên helbestê çêdike û jê "Evîntirş"ê derdixe.
Di evîntirsê de çîrok li dor Koçero diçin û tên. Ew, evîn, jiyan...
Ji diyalogên çîrokê diyologeke di navbera Koçero û evîndara wî de wisa derdikeve pêşberî xwendevan:
- Merheba ji te re.
- Merheba!
- Tu zû dimeşî, tu dizanî ne werê? Ez dudilî mam bê gelo tu direvî ji ber tiştinan yan jî tu berra wan didî?
- Tu bi kîjanî qayîl bî hema!"

Peyvên di nav wan de, gotinên li ser jiyana hundirîn a leheng û di navê re jî kurtediyalog. Yek ji wan diyalogên xweşik jî wisa ye:
- Ez dibêjim pey min negota ka em rûnin ê te nedihat bîra te jî. Tu nabetilî qey?
- Ez dibetilim çawa. Lê bawer bike rûniştin nedihat bîra min. Bi salan e ez betilî me. Tu dibêjî ez rûnim ez ê rehet bibim?"

Bajar Mîrzeman kî ye?

Nivîskar Bajar Mîrzeman di sala 1981'ê de gundê li Xirbêbeleka ku bi ser navçeya Qoserê re ye hatiye dinê. Di sala 2006'an de Zanîngeha Dîcle, Fakulteya Perwerdehiyê ya Sêrtê, Beşa Mamostetiyê qedandiye. Heta niha nivîsên wî di kovara Çirûskê de hatine weşandin. "Evîntirş" yekem pirtûka wî ye.

Evîntirş / Bajar Mîrzeman / Weşanên Belkî / 80 rûpel / Berfanbar 2009