BOTAN GERMIYANÎ-HEWRÊ KIRÊKAR/ GERMIYAN

Pirtûkxaneya  Giştî ya Kifrî li bajarokê Kifrî ya Kelar a ser bi herêma Germiyan e, di sala 1963'yan de ji aliyê hikumeta wê demê ya Iraqê ve hatiye avakirin û piştre di sala 2007'an de ji aliyê hikûmeta Herêma Kurdistanê ve hat nûjenkirin.

Li Pirtûkxaneya  Giştî ya Kifrî zêdetirî 19 hezar û 500 pirtûk û çavkaniyên bi zimanê kurdî, erebî û îngilîzî derbarê zanistên giştî, ol, rêziman, felsefe, wêje û çend mijarên din de hene.

Di sedsala borî de, ji ber sedemê hebûna çavkaniyên baş û girîng piraniya xwînerên wê herêmê diçûn û sûd jê digirtin, lê tişta ji berpirsên pirtûkxaneyê re bûne cihê fikarê, ew e ku piştî sala 2003'yan ve ji dema rûxîna rejîma Baas a Iraqê ve kêm kes diçin pirtûkxaneyê. Mehê derdora 30 kesî serdana pirtûkxaneyê dikin, ew jî xwendekar in ji bo nivîsandina tezan û lêkolînkirinê sûd jê digirin.

Berpirsê Pirtûkxaneya  Giştî ya Kifrî Bazyan Sabîr diyar kir ku sedemê kêmbûna xwendevana pêşketina teknolojiyê û mijolbûna ciwanan a torên civakî û destkeftina pirtûkên elektronîk in.

Sabîr bang li welatiyên Kifrî û bi taybet ciwanan kir ku ji bo bibin xwedî civakekî tendurist serî li pirtûkxaneyê bidin û pirtûkan bixwînin.

Pirtûkxaneya Giştî ya Kifrî xwedî bînahiyekî mezin e, lê qada serî ya bînahiyê û hola jêr bi biryara Wezareta Xwendina Bilind û Wezareta Rewşenbîrî ya Herêma Kurdistanê dane Kolêja Ziraetê ya Zanîngeha Germiyan. Ev jî asteng e li pêşiya lidarxistina çalakiyên hunerî û edebî li nava pirtûkxaneyê.

Ji derveyî Pirtûkxaneya Giştî ya Germiyan li bajarokê Kifrî du pirtûkxaneyên din hene. Yek li qewexanaya bajarok e û ya din jî li Gelerî Şêwakarên Kifrî ye ku ji aliyê nivîskar û rewşenbîran ve hatiye vekirine.

Ji Rojnewsê hatiye girtin