Diyarname

Festîvala Fîlma a Navneteweyî ya Berlînê 'Berlînale' îsal 67'emîn car deriyên xwe vedike. Festîval roja 9'ê mehê bi nîşandayîna filmê derhenêr Etienne Comar ê bi navê "Django" dest pê dike.

Etienne Comar senarîst û produktor e û yekem car derhêneriya fîlmekî dike. Bi fîlmê "Django" dest bi derhênerî kir û fîlm di Berlînale de ji bo "Hirça Zêrîn" di pêşbaziyê de ye. "Django" li ser jiyana muzîkarê cazê yê fransiz Django Reinhardt hatiye kişandin. Django Reinhardt avakarê cureyek muzîkê ku navê 'Gypsy-Swing' lê kirine ye û di heman demê de avakarê muzîka cazê ya Ewropayê ye. Django Reinhardt di sala 1901'an de hatiye dinê û 1953'yan de miriye. Fîlm li ser jiyana wî û di heman demê de qala reva wî ya ji Parîsê dema ku di sala 1943'yan de Naziyan ew der dagir kiribû dike. Ji ber ku Django Reinhardt û malbata wî Sîntî ne rastî hêrsa Naziyan hatibû û Nazî ketibûn dû wî.

Dîrektorê  Berlînale Dieter Kosslick li ser fîlm wisa gotiye, "Fîlm jiyana çalak a Django û çîroka wî ya li jiyanê mayînê bi awayekî herîkbar vedibêje. Her di bin tehdîdê de mayîn, rev û zilma li malbata wî hatiye kirin jî nekariya wî ji muzîkê veqetîne."

Rola Django lîstikvan Reda Kateb dilîze. Senaryoya fîlm Comar û Alexis Salatko nivîsandiye û koma cazê ya Hollandî "Rosenberg Trio” muzîka Reinhardt ji bo muzîkên fîlm ji nû ve saz kirine.

Di Berlînale de îsal 11 fîlm ji bo xelata Hirça Zêrîn dikevin pêşbaziyê ku  Serokatiya Juriyê derhênerê hollandî Paul Verhoeven (derhênerê fîlmên wekî "Basis Instinct”, "Total Recall) dike.

Yek ji fîlmê ketine dû Hirça Zêrîn "Django" ye û reqîbên fîlm ên xurt jî hene. Mînak derhênerên navdar Aki Kaurismaeki, Agnieszka Holland û Sally Potter bi fîlmên xwe dikevin pêşbaziyê.

Berlînale 19'ê mehê bi xelatdayînê dê bi dawî bibe.