Diyarname

Gelek kesên ku diçûn "Navenda Sînemayê ya Mîthat Alam" û jê sûde digirtin digotin qey Mîthat Alam miriye, lê na Mîthat Alamî bi xwe ew der vekiribû û xistibû bin fermana sînema û sînemahezan. Ew Alam niha, yanê roja 28.11.2016'an wefat kir.

Mîthat Alam di sala 1945'an de li Stenbolê hatiye dinê, di sala 1968'an de ji Koleja Robert mezûn bûye, di Zanîngeha Bogazîçî de di sala 1998'an de dest bi dayîna dersên sînemayê kir. Alam ku her dixwest bi komek jîr re bixebite ji ber vê bi mulakat xwendekar digirtin dersa xwe. Mîthat Alam yek ji hezkiriyê herî mezin ê sînemayê bû li nav sînemaya Tirkiyeyê. Wî gelek ked ji bo sînemayê da û di sala 1999'an de li navenda Zanîngeha Bogozîçî bi navê "Navenda Fîlman a Mîthat Alam" vekir. Ev der wisa navendek e ku kesê/a bi sînemayê re eleqedar e miheqeq hay ji vê derê heye, gelek ji van jî sûde ji vê derê wergirtiye. Ev der hê jî vekiriye û kar dike.

Li Mîthat Alamê bi ser 3 hezarî de arîşava fîlman heye û gelek kes diçin bê pere jê sûde digirin. Dîsa ne zêde mezin be jî ew der xwedî salonek sînemayê ye, di vê salonê de heta niha gelek fîlm hatine nîşandayîn, niha jî têne nîşandayîn û li ser sînemayê sohbet, gotûbêj hatine kirin.

Kesên navdar ên sînemaya Tirkiyeyê wekî Nurî Bîlge Ceylan, Dervîş Zaîm, Reha Erdem, Fatih Aksoy Kerem Kurdoglu, Ezel Akay rêya wan bi wir ketiye. Ji sînemagerên kurd jî hin jê berhemên wan li vir hatine nîşandayîn.

Her wiha ev navend bi navê "Altyazi" (Jêrnivîs) kovarek sînemayê jî derdixe.

Mîthat Alam ku heta niha gelek xelat girtibû herî dawî ji 36'emîn Festîvala Fîlman a Navneteweyî ya Stenbolê "Xelata Keda Sînemayê" girtibû.

Ev Mîthat Alamê ku ew qas ked ji bo sînemayê daye xatir xwest. Cenazeya wî 30'ê mehê li Goristaya Aşiyan a Rumelî hat veşartin.

Kurtedemek berê ji Weşanên Îletîşîmê pirtûkek bi navê "Mithat Alam Sînemayî Sevin Adam" (Mîthat Alam Zilamê ji Sînemayê Hez Dike) derket (Umut Bariş Donmez pêre hevpeyvîn kiriye û wekî pirtûk hatiye çapkirin). Di pirtûkê de jiyana wî ya şexsî, hezkirina wî ya sînemayê, agahiyên wî yên li ser fîlm û derhêneran, her wiha çîroka vekirina navenda navborî cih digirin.