Diyarname
Birê Rêberê PKK'ê Abdullah Ocalan Mehmet Ocalan duh çû Girava Îmraliyê ligel Ocalan hevdîtin çêkir û îro li Amedê ligel kesên di greva birçîbûnê re daxuyanî da çapemeniyê. Mehmet Ocalan pêşî bi kurdî axivî, dûre bi tirkî.
Mehmet Ocalan got ku mafên wan ên zagonî û hiqûqî ji wan hatiye girtin, tecrîd dom dike, ev du sal bûn nehişt ew wekî malbata wî herin, parêzerên wî jî neşandin, mafê wî hatiye binpêkirin. Dûre Mehmet Ocalan gotinên Ocalan ragihandin.
Vane ji gotinên Mehmet Ocalan:
- Wî ji her kesî re silav û hurmetên xwe şandin. Bi qasî 60 deqî me xeber da.
- Divê her kes li cihek dirust be. Ez ji bo aştiyê, ji bo xwîn bisekine tevdigerim.
- Her sê hevalên wî jî hebûn, gotin em bi hev re dixebitin. Erê tecrîd didome, lê rewşa me wekî berê ye. Pirsgirêk nîn e. Projeyên me hene, ger dewlet amade be em dikarin di 6 mehan de temam bikin. Me pêvajo bi dawî nekir, wan bi dawî kir.
- Ger dewlet ji dil be ev pirsgirêk dê çareser bibe, ew qas mirov nemira, ez her roj ranazim, li her derê mirov dimirin. Ger dewlet amade be bila du zilamên xwe bişîne vir, emê li ser bixebitin, 6 mehan de meseleyê çareser bikin. Ev şerek kor e, kes nikare kesî têk bibe. Ev 40 sal e didome, belkî 80 salên din jî bidome. Heyf e.
- Ev çareserî bi yek alî nabe. Aliyê mezin dewlet e. Dewlet gav biavêje dê çareser bibe.
- Ger dewlet dewletek hiqûqî ye, bila parêzeran, heyeta berê bişîne.
- Ji aliyê tenduristî ve rewşa me baş e.
- Ez cejna her kesî pîroz dikim lê ger li welatek her roj 20-30 kes dimirin ew cejn jî nabe cejn. Bila hemû partiyên siyasî, aliyên demokrat bên ba hev, ji bo çareserî tevbigerin, her kes çi bar dikeve ser milan bila bike.
Greva birçîbûnê bi dawî bû
Di vê navberê de li ser navê 50 kesên ketine greva birçîbûnê ya bê dem û bê veger Hevseroka KCD'ê Leyla Guven axivî û got, me gotibû heta em xeberek ji birêz Ocalan bigirin emê grevê bidomînin. Niha kekê Mehmet xeber ji me re anî, em ji îro de dawî li greva xwe tînin.
