ÊLIH (DİHA)

Miftiyê berê û mebûsê Amedê yê HDP'ê Nimetullah Erdogmuş, xwest her kes destê xwe bide xwebirayên xwe yên koçber û fitre û zekata xwe bide malbatên koçber. 

Alîkarî û piştgiriya bi malbatên ku hêzên dewletê xaniyên wan xera kir û di konan de dijîn re berdewam dike. Ji bo piştgirî û alîkariya bi malbatan re hê xurtir bibe bang tên kirin. Wekîlê HDP'ê yê Amedê Erdogmuş, bi minasebeta rojiya Remezanê bang li hemû gelê Kurdistanê kir ku di vê meha pîroz de xwe û birayên xwe yên koçber bi tenê nehêlin û di vê meha pîroz de fitre û zekata xwe bidin wan. Erdogmuş, da zanîn ku li Gever, Cizîr, Sûr, Nisêbîn û Şirnexê ji ber êrîşên hêzên dewletê bi hezaran xanî xera bûn û bi deh hezaran malbat di konan de dijîn. 

Erdogmuş, ji hemû kesên misilman xwest piştgirî xwest. Erdogmuş got ku di vê meha Remezanê de xêr, alîkarî û piştgiriya bê kirin gelek zêde ye û wiha got: "Di vê mehê de, ya girîng ne tenê mirov xwe birçî bihêle. Ya girîng mirov rewşa cîran û yê tenişta xwe hîs bike û destê alîkarî û piştgiriyê dirêjî bide wan. Niha li derdora me kesên xizan, bê mal, bê war hene. Divê em van kesên derdora xwe bibînin û destê alîkarî û piştgiriyê dirêjî wan bikin. Li gem meha Remezanê desthilatdarî dîsa şer geş kir. Di cîhanê de tu dewlet di hişmendiya şer de nehatine guhertin. Divê em bi alîkarî û piştevaniyê berxwedana xwe xurt bikin. Divê em destê xwebirayên xwe li hewa nehêlin û dirêjî neyarê wî nekin."

Her wiha Komeleya Rojava ku navenda wê li Amedê ye û li gelek bajarên din şaxên wê hene demek berê daxuyandibû ku fitre û zekatên xwe ji bo gelê ku ji cih û warên xwe bûne bişînin.