DÊRIK

Heyeta jinan ku di nav de mebûsên jin, rojnameger û nivîskar hene derbasî rojavayê Kurdistanê bû.

Bi armanca şopandina rewşa koçberên Şengalê û bi taybetî rewşa jinên koçber ên Şengalê ku di kampa Newroz a bajarê Dêrika Rojava de ne bibînin heyet ji bakurê Kurdistanê derbasî başûrê Kurdistanê bû û ji vir jî di deriyê sînor ê Sêmalka re derbasî rojavayê Kurdistanê bû.

Di nav heyetê de mebûsa HDP'ê Sebahat Tuncel, mebûsa CHP'ê Melda Okur, nivîskar û endama Partiya Meclisa Gelan a HDP'ê Huda Kaya, endama Meclisa Jinan a DBP'ê Nîhayet Taşdemir, rojnameger Nuray Mert, Pinar Ogunç, Esra Çiftçi, Asya Tekîn, Nîlay Vardar, Burcu Canso û Muge Îplkibcî hene. Heyet ji aliyên Wezîra Jinan Emîne Umer û herdu cîgirên wê Heyfa Erbo û Emel Gewriyê, Wezîra Maliye Remziye Mihemed, Berpirsiyara Têkliyan a Yekîtiya Star Nûbihar Mustefa, Nûnera Têkliyên Dîplomasî ya Yekîtiya Star li Başûrê Kurdistanê Nûjîn Yûsif, Nûnera Têkliyên Dîplomasî ya Yekîtiya Star li Lubnanê Leyla Qerman, Endama Desteya Rêveber a Komîteya Têkliyan a Yekîtiya Star a bajarê Qamişlo Qedriyê Hisên û Endama Kordînasyona Yekîtiya Star Henîfe Hisên ve hate pêşwazî kirin.

Endamên heyetê diyar kirin ku armanca serdana wan a Rojavayê Kurdistanê ew e ku rewşa koçberên Şengalê li Rojava û bi taybet rewşa jinan ji nêz ve bişopînin.

Heyet piştî derbasî Rojava bû, berê xwe dane kampa Newroz a bajarê Dêrikê û ji vir jî dê here bajarê Girkê Legê û bi hevserokên Cizîrê û rêveberên Akademiya Yekîtiya Star a Ramanê re bicivin.