Diyarname

Li her derê Cejna Zimanê Kurdî tê pîrozkirin. Vane notên li ser vê:

Celadet Elî Bedirxan di 15'ê gulana 1932'yan de kovara bi tîpên latînî Hawarê derxist. Di sala 2006'an de Kongreya Neteweyî ya Kurdistanê (KNK) jî ev roj wekî Roja Zimanê Kurdî pejirand û ji wê rojê de kurd Roja Zimanê Kurdî pîroz dikin.

- Di navbera 15-22'yê gulanê de li Amed, Batman, Wan, Şirnex, Sêrt, Culemêrg, Agirî, Îdir, Qers, Bedlîs, Semsûr, Riha, Enqere, Îzmîr, Stenbol, Farqîn, Erxenî, Pîran, Karaz, Hênê, Hezro, Çinar, Qoser, Şemzînan, Gever, Çelê, Elbak, Gîhadîn, Dîgor, Kaxizman, Miks, Norşîn, Tetwan, Bazîd, Patnos, Qerqelî, Erdîş, Bêgirî, Melazgîr, Serêkaniyê, Wêranşar, Pirsûs, Silopî, Nisêbîn û gelek cihên din dê daxuyaniyên çapemeniyê bi tevlîbûna girseyên gel bên dayîn.

- DTP'ê daxuyaniyeke weşand da zanîn ku di nav jiyana gel û mirovahiyê de rojên girîng hene, Roja Zimanê Kurdî jî ji bo kurdan rojeke bi vî rengî ye û ev roj pîroz kir.
DTP'ê di daxuyaniya ku li ser Roja Zimanê Kurdî weşand de wisa got: "Ziman ku amûreke ragihandinê ye, di heman demê de parastina nasnameya gelekî, amûreke ragihandina çandê ya ji bo pêşerojê ye. Divê zordariyên li ser kurdî ji holê bêne rakirin, rêya pêşketina kurdî bê vekirin, mafê perwerdehiya bi zimanê kurdî û bikaranîna ziman a di saziyên fermî de bê qebûlkirin û ziman bikeve bin ewlehiya zagonê."
DTP'ê rexne li hikumeta AKP'ê jî kir, got ku hikumeta AKP'ê ji aliyekê ve bi kurdî kanaleke vedike, dixwaze beşên Kurdolojiyê veke, lê ji aliyê din ve daxwaza perwerdehiya bi zimanê zikmakî wekî "cudaxwazî" dibîne, ji ber ku şaredarên me di xizmetên xwe de cih dane kurdî ceza li wan dibire.

-Ji bo Cejna Zimanê Kurdî Serokatiya KONGRA GEL jî daxuyaniyek weşand û ev roj li kedkarên zimanê kurdî, li hemû kurdistaniyan pîroz kir.

- Enstîtuya Kurdî ya Stockholmê ji bo vê rojê di navbera 14,15 û 16'ê mehê de çalakiyan li dar dixe. Di nav van de semînerên da dê kesên wekî Aso Germiyanî, M. Nazîf Mayî, Hekkî Balta, Dr. Huseyin Xaliqî, Firat Cewerî, Serkan Birûsk û Haydar Diljen amade bin.

- Li Enqereyê jî ji aliyê Kurdî-Derê ve dê 16'ê mehê bi beşdariya  mebûsên DTP'ê Hamît Geylanî û Osman Ozçelîk, nîvîskar Selîm Temo û zimanzan Zulkuf Ozkan, li salona ÎMO panela bi mijara "Dewlemendiya kurdî" bê lidarxistin.