Qamişlo

Ev nêzî hefteyek e dewleta Tirkiyeyê bi balafirên bê mirov ên şer êrîşê Bakur û Rojhilatê Sûriyeyê dike. Di van êrîşan de ji kargehên çîmento, stasyonên elektrîkê heta ofîsên genim bûn hedef. Di vê navberê de endamên asayîşê jî canê xwe dan. Û îro Rêveberiya Herêma XWeser a  Bakur û Rojhilatê Sûriyeyê 3 roj şîn ragihand

Rêveberiya XWeser îro bi daxuyaniyek eşkere kir ku di êrîşa şeva borî ya dewleta Tirkiyeyê de 29 endamên Hêzên Têkoşîna Dijî Hişbirê canê xwe ji dest dane. Rêveberî got ku 8'ê mehê li hemberî nuqteyên li Dêrik û Rimêlanê êrîş çêbûne û wiha got, "Di nav de Akademiya Têkoşîna Dijî Hişbirê êrişeke xwîndar pêk hat. Ev akademî 24 saetan ji bo parastina civakê ji bandorên hişbirê kar dikir. Her wiha gelek cihên petrolê û herêmên sivîlan û di nav de projeyên çandiniyê yên li gundewarê Dirbêsiyê hatin hedefgirtin û hejmareke xebatkaran birîndar bû. Di encama êrîşên duh û îro de 29 endamên Hêzên Têkoşîna Dijî Hişbirê şehîd bûn, 28 jî birîndar bûn û rewşa hinekan ji wan giran e.

Di daxuyaniyê de bang li qada navneteweyî hatiye kirin û wisa hatiye gotin, "Divê li hember binpêkirinên Tirkiyeyê yên dijî herêmên me yên ewle û gelê me û hêzên me yên leşkerî helwestên navnetewî yên zelal hebin."

Di dawiya daxuyaniya de hatiye ragihandin ku li hemû herêmê 3 roj şîn danîne.