Yûsiv Biyanî
Min dil berda te, te agir berda min!
Ji ber ku tu, tu tiştî nabêjî, tu dizanî min çi kir dilê? Min heft dojeh di dilê xwe de honandin. Were dilê, were! Were bibîne ka te agirekî çawa berdaye vî dilê reben? Ev dilê rebenê ku di van şevên tarî û bêhêvî de ji ber bêîmaniya te, xwe tenê disparte çend kerî helbest û hestên ku xwe dirijînin li ser rûpelên wek te gewr!
Şev e delalyê
xwe bar kiriye
raketin herimandiye
ji bo dilan!
Lê lê dilê! Ma qey tu nizanî ku riya mirov ronî nebe, tarîbûn hespê kimêt siwar dibe û bi hemû hêza xwe ve dil dipêçe û hêdî hêdî dil diperçiqîne? Kuştina dil e dilê! Dil hatiye dorpêçkirin delalyê! Tu hîna difikirî û mahana te ew e ku dilê te ne zelal e. Delalyê min li vir dilekî birîndar dinale û fermana kuştina xwe bi xwe dide, çawa tu ew qas dûr disekinî? Delalyê di vê tevliheviyê de vî dilê reben dest pê kiriye û ji xwe re xeyalan diafirîne. Di demên wiha afirandina her xeyaleke nû, gaveke li ber xwekuştinê ye.
Delalya min! Ev merhale hebûn-nebûna te ye. Ev dilê reben nizane dê te deyne kîjan alî? Tu tune yî ji ber ku ev dilê reben nikare xwe bigihîne bejn û bala te. Nikare helbesta ku ev demeke li ser lêvên wî digere li ser stûyê te wekî baraneke gur bireşîne. Tu heyî ji ber ku ev xeyalên bêîman te diafirînin. Ji ber ku her kes û her tişt tu yî. Her wekî çawa helbestvanekî gotibû: ‘‘Di nebûna te de her tişt dişibe te.’’
dîsa xeyalên bêîman
di dil de civiyane
wek şeyatnokên şevê
dil dixapînin
dil;
reben
bêçare
û
bêhêz e
Delalyê ev dil ji zozanên li ser çiyayên bilind hatiye. Zozanên ku di nav wan de xure xura kaniyên sar in… Dema ku tî be dê zû biçilmise. Divê tu bizanibî ku ev dil tî ye niha. Bizanibe delalyê tîbûnê lê da Şex Seîdê Paloyî jî kuşt (1), dê çawa vî dilê zarok nekuje? Şêx Seîdê ku ji ber her gava wî erd dihejiya!
Erê delalyê ez niha di van şevên bêxew de di nav xeyalên te de diçim û têm. Divê tu ji bîr nekî ku divê mirov gulan av bide! Ma qey hewcet e ku ez bibêjim…
Delalya dila
avê bide gula
bila gul şîn be
bibe dermanê dila!
1) Mîrname; Jan Dost
***
Nivêsên Yûsiv Biyanî yên ku berê di Diyarnameyê de hatine weşandin:
- Ew û ev dem
- Delalya dilê min!
- Ka binihêrin 'berf dibare' an 'kar yagiyor'
.jpg)
