Diyarname
Hevserokê DBP'ê Kamuran Yuksek ku ji bo pîrozbahiyên Newrozê çûbû Qersê vê sibê li wê derê hatibû binçavkirin, piştî îfadeyên wî girtin ew berdan.
Yuksek vê sibê hat birçavkirin û ew birin Midûriyeta Emniyetê ya Qersê. Hat gotin ku ji ber li Dadgeha Cezayê Sulhê ya Batmanê der barê wî de doz hatiye vekirin ew hatiye binçavkirin. Li Emniyetê piştî îfadeyên wî yên der barê lêpirsîna hatiye kirin de girtin ew berdan.
Yuksek piştî berdanê ligel Berdevkê HDP'ê Ayhan Bilgen li avahiya DBP'ê daxuyanî da çapemeniyê û got ku binçavkirina wî ji bo sabotekirina Newroza li Qersê çêbûye û wisa dom kir: "Tiştek gelek biçûk ku me ragihandinek ji bo dozger bikira dê mesele çareser biba lê bi taybetî binçavkirin çêkirin. Tiştek bi wateye ku binçavkirin îro çêkirin."
Hevserokê DBP'ê Yuksek li ser qedexekirina Newrozan ku walîtî qedexe dikin jî got ku AKP bi qedexekirina Newrozan dixwaze xirecirê gurtir bike û got: "Kevneşopiya Newrozê ku ev 2 hezar û 400 sal didome ne bi destûra AKP'ê ye, ne mimkûn e bi destûra wê be jî."
Yuksek got ku li 82 cihan ji bo Newroz bi aramî derbas bibe serî lê dane lê destûr nehatiye dayîn û pirsa ku par çima li her derê destûr hat dayîn, îro nayê dayîn kir. Her wiha Yuksek bang li gel kir ku xwedî li Newrozê derên.
