Diyarname
Jîr Dilovan nivîskar û wergêrekî kurd e. Ew di sala 1956’an de li gundê Hêştireka Midyada Mêrdînê hatiye cîhanê. Dibistana seretayî li gund, ya navîn li Midyadê û dibistana mamostetiyê jî li Kirşehir bajarê Tirkiyeyê di sala 1975’an qedandiye. Dû re jî xwendina xwe ya bilind li Zanîngeha Anatolî ya Eskîşehirê kuta kiriye. Dest bi mamostetiyê kiriye.
Sala 1983’yan ew li gundê Apê Mûsa (Musa Anter) dest bi gerînendetiya dibistanê dike, li wir Apê Mûsa dinase. Di salên 90’î de ew li navenda Mêrdînê bi cih dibe.
Bi pêwana daîreya Navenda Perwerdeya Gel ew li girtîgeha Mêrdînê dersên tembûrê (saz) dide girtiyan. Wekî din çalakiyên xwe û xebatên xwe yên li ser ziman û wêjeya kurdî jî berdewam dike. Ji aliyê din ve çend xort û qîzên kurd li hev kom dike û bi navê “Koma Jîr DILOVAN” komeke muzîk û dîlanê pêk tîne. Tevlî çend şahî û dawetên kurdan jî dibin û kaseteke amator a muzîka kurdî jî dadigirin.
Bi navê Nûşer Dîlan hinek nivîsên kurdî dinivîsîne. Bi pêşniyara Apê Mûsa bernavkê Jîr bikartîne ku ew jî Dilovan pê ve dike.
Bi weşana rojnameya Welat re, Apê Mûsa jê dixwaze ku ew nivîsên xwe bişîne rojnameyê. Ew bi nivîs û berhevkên zarokan dest bi nivîsê dike û êdî bi çîrok, helbestên fabl û bi hevpeyvînan berdewam dike. Di heman demê de ew di rojnameya “Ulke” ya heftane de jî li ser çand û wêjeya kurdî bi tirkî dinivîse.
Ew di sala 1992’yan de tê girtin û di sala 1995’an de neçar dimîne biçe Ewropayê. Jîr Dilovan ê ku bi bikaranîna kurmancî jî nasdar e li wir jî xebat û çalakiyên xwe didomîne.
Heya niha di gelek kovar û rojnameyan de nivîs û helbestên wî hatine weşandin. (Welat, Welatê Me, Rewşen, Jiyana Rewşen, Nûdem, Huner, Amara, Kovara W) Di kovarên Huner û Amara de di desteya weşanê de cîh girtiye.
Lîstika wî ya bi navê “Qolinc” (15 beş) û gelek skeçên wî di Med Tv de hatine weşandin. Di Televîzyona Mezopotamya de, di bernameya Rojbaş Kurdistan de, dersên zimanê kurdî dane û demekê bernameya "Destpêka Rojê" amade û pêşkêş kiriye. Di Radyoya Dengê Mezopotamya de, sê bernameyên wêjeyî yên bi navê "Ji Kaniya Wêjeyê,", "Şana Helbestê" û "Li Benda Rojê" amade û pêşkêş dike.
Berhemên wî yên ku heta niha hatine weşandin:
- Zenga Zêrîn, Roman, Weşanên Mezopotamya, 2003
- Ji Biçûkan re Çîrok Ji Mezinan re Dîrok, Helbestên Fabl, Weşanên Şaredariya Sûra Amedê, 2006
- Bi Pirs û Bersivan Dîroka Kurd û Kurdistan Cild-1, Weşanên Pêrî, 2007
- Ji bo Kesên Gihîştî, Mamoste û Perwerdekaran Waneyên Kurdî-Kurmancî, Weşanên Enstîtuya Kurdî, REWSEN, 2008
- Qolinc, Senaryo – ristefîlm, DVD 1-2-3
Werger:
- Arî Mezin - Kurdên Elewî Di Dorpêça Agir de, Weşanên Eylem, 2001
- Abdullah Ocalan: Ji dewleta rahib a Sumer ber bi Şaristaniya Demokratîk, Cild-I, 2003
- Abdullah Ocalan: Ji dewleta rahib a Sumer ber bi Şaristaniya Demokratîk, Cild-II, 2003
- Bextiyar Qehreman: Banga Ji Heskîfê, Helbest, Weşanên Pêrî, 2006