Amed
Hevserokê DTP'ê Ahmet Turk hilbijartin nirxand û got: "Encamên hatine bidestxistin polîtîkayên înkar û îmhayê yên ji bo pirsgirêka kurd pûç derxistine. Ji bo çareseriyeke demokratîk û aştiyane fersendeke nû daniye holê. Hewldanên Serokwezîr Erdogan ên piştî 22'ê Tîrmehê Tirkiye ber bi qonaxeke xeternak ve bir. Gelê me bersiva Hikûmeta AKP'ê da."

Hevserokên DTP'ê Ahmet Turk û Emîne Ayna li Amedê civîneke çapemeniyê li dar xist û hilbijartina 29'ê Adarê nirxand.
Parlamenterê DEP'ê yê berê Hatîp Dîcle, Şaredarê Bajarê Mezin ê Amedê Osman Baydemîr, şaredarên ku nû hatine hilbijartin û Serokê DTP'a Amedê Alî Şîmşek û gelek kesên din tevlî civînê bûn.
Di civînê de Turk spasiyên xwe ji bo hemû kesên keda wan ketiye nav vê hilbijartê pêşkêş kir û got: "Gelê me îradeya xwe bi awayekî vekirî daniye holê. Encamên hatine bidestxistin polîtîkayên înkar û îmhayê pûç derxistin. Ji bo pirsgirêka kurd fersendeke nû ya ji bo çareseriyeke demokratîk û aştiyane daniye ber me. Serokwezîr Erdogan ligel hilbijartinên 22'ê Tîrmehê ketibû nav hewldanan û vê yêkê Tirkiye ber bi pêvajoyeke xeternak ve bir. Her kesekê ku ne ji wan bû tune hesibandin. Lê gelê me bersiveke hêja da Hikûmeta AKP'ê."

Hevserokê DTP'ê Turk anî ziman ku gelê kurd di hilbijartinên 22'ê Tîrmehê de bi hêviya çareserkirina pirsgrêka kurd ligel DTP'ê deng da AKP'ê û wiha berdewam kir: "Min di nirxandina xwe ya piştî hilbijartinên 22'ê Tîrmehê de gotibû gelê kurd 'dengên xwe emanet' dan AKP'ê. Lê Hikûmeta AKP'ê ev dengên gelê kurd bi şert dabûn wan tune hesibandin. Bawer kir ku ew ê bi rêbazên şîdetê pirsgirêka kurd çareser bikin. Divê bê dîtin ku van polîtîkayan îflas kiriye."

Bila walî ji bo gel xizmetê bikin

Turk di axaftina xwe bal kişand ser helwesta waliyên li bajarên Kurdistanê peywîrdarin û anî ziman ku AKP'ê ligel rêberiyên xwe yên bajaran bi hevkariya waliyan xwest gel bi alikariyan bixapîne. Turk got divê walî bibin waliyên gel û wiha dirêjî da gotinên xwe: "Piştî hilbijartinên 22'ê Tîrmehê waliyên herêmê wekî serokên bajaran ên AKP'ê tevgeriyan. Em bangî waliyan dikin ku bêyî ferqê bêxin nava gel ji her kesê re xebatan pêk bînin. Îqtîdar diguherin lê gel dimîne. Em li Mûş, Mêrdîn û Agiriyê bi rastî zextan hatin. Li Şirnexê polîsan bombeya gazê avêtin dibistana ku 25 sindoq lê bûn. Li Mêrdînê li hin dibistanan peywirdarên me hatin dûrxistin û sindoq hatin revandin. Li Agiriyê heta vê saetê encamên hilbijartinê nehatine eşkerekirin. Ev yek di nava gelê me de bûye sedema gumanan. Li Tuzlucaya Qersê ligel ku hilbijartin me bi dest xist, encameke cihe derxistin holê. Li Gimgima Mûşê alîgirên AKP'ê yên ku dît hilbijartinê winda dikin êrîşî Serokê Giştî yê BDP'ê Demîr Çelîk kirin. Ew kêr kir. Ligel van pêkanînan hemûyan gelê me di sindoqan de dersa hêja daye îktîdarê."

'Me şaredariyên xwe ji 56'ê derxistin 98'an

Turk diyar kir ku ligel zora rayedarên cemaweriyê û îktîdarê li Mûş, Agirî, Bedlîs, Mêrdîn û Çewlikê gel piştgirê daye DTP'ê û wiha berdewam kir: "Li van bajaran 4 hezar leşker û polîsan wekî blok dengên xwe dane AKP'ê. Yekemînbûna me ya di hilbijartinên Meclisa Giştî ya Bajaran a li Mêrdîn, Mûş û Agiriyê de vê rastiyê nîşan dide. Hilbijartinên 29'ê adarê îradebûna gelê me da der û hejmara şaredariyên me ji 56'ê derxistiye 99'an. Ev encam gelê me daniye holê. Ez gelê me pîroz dikim."
Turk piştre pirsên rojnamegeran bersivand. Turk anî ziman ku li Mêrdînê DTP'ê 12 hezar AKP'ê 14 hezar deng girtin û wiha pê de çû: "Polîs û leşkeran dengên xwe blok bi kar anîn. Dengên wekî blok hatine bikaranîn bandor li ser îradeya gel kir."

Baydemîr spasî kir

Şaredarê Bajarê Mezin ê Amedê Osman Baydemîr jî li ber avahiyê partiyê xîtabî girseya ku civiya bû kir û spasiyên xwe yên ji bo gel anîn ziman.
Baydemîr wiha got: "Ev serkeftina we ye. Serkeftina me hemûyan e. Ji îro de em ê dest pê bikin ne 8 saetan 16 saetan em ê bixebitin Û xizmetê ji bo gelê xwe bikin. Em çiqas bixebitin em ê xwe ji bo we deyndar bibînin. Em ê ji niha şûn de ji bo ku hêjayî gelê xwe bin, bixebitin."

Ji DÎHA'yê hatiye girtin