Diyarname

Li Stenbol, Mûş, Culemêrg û Trakyayê rewşa dawî ya li ser pîrozbahiyên Newrozê... Emê peyder pey cihên Newrozê her ku eşkerebûn pêşkêşî we bikin. Niha yên diyar bûne:

Li Stenbolê serî lê dan

Li Stenbolê komîteya amadekar a Newrozê ji bo pîrozbahiya Newrozê serî li Walîtiya Stenbolê da. Di nav komîteya amadekar de DTP, ESP, EMEP, KOZ, Navenda Çanda Gel (HKM) û partiyên din ên siyasî hene.
Ew dixwazin di 23'yê adarê de li Kizliçeşmeya Zeytînburnuyê Newrozê pîroz bikin

Li Mûşê li 6 cihan dê bê pîrozkirin

Li Mûşê îsal dê li 6 cihan Newroz bê pîrozkirin. Li gor agahiyên ku ji Mûşê hatin dê 18'ê mehê li beldeya Erentepeya Bûlanixê dest bi pîrozbahiyê bê kirin, 19'ê mehê li beldeya Gulkuru ya Melezgîrê, 20'ê mehê li Melezgîrê, li Varto û Bûlanixê 21'ê mehê û li navenda Mûşê jî dê 22'yê mehê de Newroz bê pîrozkirin.
Heta niha ji bo Bûlanix û Melezgîrê serî li qeymeqamiyan hate dayîn.

Li Trakyayê Newroz

Li Trakyayê li rêxistina DTP'ê ya Edirneyê ji bo pîrozbahiya Newrozê serî li walîtiyê da. Edîrne, Tekîrdag û Kirklarelî dê bi hev de roja 21'ê adarê li Taxa Saglik a Çorlu Newrozê pîroz bikin.

Newroz li Geverê 23'yê mehê ye

Li Gevera Culemêrgê Newroz îsal di 23'yê mehê de tê pîrozkirin. Li Geverê serîlêdana ji bo pîrozbahiyê pêk hat lê ji ber tîpa 'W' Midûriyeta Emniyetê serîlêdan qebûl nekir, rêxistina DTP'ê ya Geverê jî serîlêdana xwe bi paş ve kişand.
Komîteya amadekar da zanîn ku ewê tevî gel li gor wateya Newrozê cejna xwe pîroz bikin.