MÊRDÎN

Heyeta HDP'ê ku ji Hevserokê Giştî yê HDP'ê Selahattin Demîrtaş û mebûsên HDP'ê pêk dihat, ligel bi hezaran welatî barîkatên polîs û leşkeran rakirin û ber bi Cizîrê ve meşiyan. 

Heyeta HDP'ê ku ji Hevserokê Giştî yê HDP'ê Selahattin Demirtaş û mebûsên HDP'ê pêk tê, ji bo piştgiriyê bidin gelê Cizîrê û ambargoya tê meşandin bi dawî bibe, ji Amedê çûn Cizîrê. Lê heyeta HDP'ê li Midyatê ji aliyê polîs û leşkeran ve hat rawestandin. Polîs û leşkeran bi maşîneyên zirxî heyet rawestand. Girseyên ku ji Êlih û Sêrtê jî dihatin gihîştin heyeta HDP'ê û li dijî barîkata polîsan çalakî pêk anî. Girseyê di çalakiyê de siloganên "Gelê Cizîrê ne bi tenê ye" û "Bijî berxwedana Cizîrê" berz kir. Bi hezaran kesên li dijî astengiyên polîs û leşkeran ber xwe dan, piştî demekê barîkatên polîsan rakirin û berê xwe dan Cizîrê. Meşa hezaran welatiyan ku di nav de heyeta HDP'ê jî heye ber bi Cizîrê ve didome.