Diyarname
TZPKurdî û Azadiya Welat li ser girtina nivîskar Hemîd Dilbihar  daxuyaniyeke weşand û girtina wî şermezar kir.

Tevgera Ziman û Perwerdehiya Kurdî (TZPKurdî) di daxuyaniya xwe ya nivîskî ku li ser girtina nivîskar nivîskar Hemîd Dilbihar weşand de qala asîmîlasyona dewleta tirk hate kirin, bal kişand ser têkoşîna gelê kurd û wiha hate gotin: “Di roja îroyîn de ev bêtehemulî hatiye asteyeke gelek dijwar. Dewlet îro ne tenê înkara zimanê kurdî dike, her wiha ji her gavê bêhtir bêhurmetî û bêtehemulî li hemberî ziman, çand û têkoşerên zimanê kurdî dike. Girtina endamê meclisa me ya navendî û têkoşerê zimanê kurdî nivîskar Hemîd Dilbihar mînaka herî manîdar ya vê bêtehemulî û bêhurmetiya li hemberî ziman û nasnameya kurdî ye. Serokomarê dewletê di parlementoya Ewropayê de qala serbestiya zimanê kurdî dike û dibêje tu astengî li hemberî ziman û çanda kurdî tune ye, lê belê li aliyê din tehemuliya pênûsa nivîskar Hemîd Dilbihar nake. Îro di şexsê Hemîd Dilbihar de qeyd li zimanê kurdî û li pênûsa nivîskar û zimanhezên kurd hatiye xistin. Yê îro hatiye girtin ne Hemîd Dilbihar e, lê belê zimanê kurdî û nasnameya kurdî ye.”  
TZPKurdî di daxuyaniya xwe de diyar kir ku tu hêz û quwet nikarin têkoşîna wan a ji bo parastin û pêşvebirina zimanê kurdî bide sekinandin û wisa hate gotin: “Em bang li dewleta bêtehemul û tirsonek dikin ku di zûtirîn demê de endamê me nivîskar Hemîd Dibihar serbest berde û hurmetê nîşanî ziman û têkoşerên zimanê kurdî bide û zimanê kurdî bi awayekî fermî nas bike û pêxe bin ewlehiya zagona bingehîn.”

Dilbihar bi îdîaya “propagandaya rêxistinê” kiriye hat girtin. Azadiya Welat bal kişand ser vê yekê û ev îdî wekî “pêkenî” bi nav kir û got: “Em wekî Azadiya Welat em zordariya li ser nivîskar û rojnamegerên kurd şermezar dikin.”

Rojnameyê girtina Dilbihar wekî bêtehamuliya li hemberî ziman û çanda kurdî bi nav kir û xwest di kurtedemê de Dilbihar bê berdan.