Diyarname
Yekîtiya Rewşenbîrên Kantona Cizîrê bi hevkariya Desteya Çandê ya Kantona Cizîrê "2'yemîn Festîvala Çandê-Beşa Kurteçîrokê" da dest pê kirin. Festîvala ku êvara 8'ê mehê dest pê kir heta 10'ê mehê dê bidome.
Di festîvalê de 45 nivîskarî bi 45 kurteçîrokên xwe cih girtine. Ji van kurteçîrokan 24 bi erebî, 21 bi kurdî ne.

'EM PIŞTGIRIYA XWE EŞKERE DIKIN'
Di merasima destpêkirina festîvalê de Hevseroka Desteya Çandê ya Kantona Cizîrê Firyel Çolî axaftina destpêkê kir û got; "Çand ne luks e, lê belê bingeha hebûna mirovan e. Ew e ku jiyanê wate dike û rêya azadiyê dide wê. Ji ber ku em çîroka kurt wekî cureyek edebî ku lêdana civakê nîşan dide rêz digirin, em piştgiriya xwe ji bo hemû destpêşxeriyên çandî yên ku ji îradeya rewşenbîr û afirîneran derdikevin piştrast dikin."

'BEŞDAR JIN Û CIWAN IN, EV MIZGÎNÎ YE'
Hevserokê Yekîtiya Rewşenbîrên Kantona Cizîrê Yûsif Kûtî jî got, "Sala borî festîvala me ya helbestan bû, lê îsal me ya çîrokan li dar xist. Piraniya kesê beşdar bûne jin û ciwan in, ev jî ji bo pêşerojê mizgîniyek e pir baş e." 

Endamê komîteya amadekar Mihemed Beşîr jî wisa got; "Ev festîval derfeteke zêrîn e ku nivîskar beşdar bibin û hestên xwe derbirînin."
Piştî axaftinan semînerek li ser dîroka derketina kurteçîrokê li dar ket. Nivîskar Mihemed Baqî Mihemed li ser mijarê axivî.
Par 1'emîn Festîvala Çandê li dar ketibû û mijar helbest bû. 60 kesan bi helbestên xwe têde cih girtibûn. Ji wan 6 helbestvan bi serketin, 3 bi zimanê kurdî 3 bi zimanê erebî bûn û ew hatin xelatkirin.

Di roja diduyan a festîvalê de wê semînerek rexneyî li ser çîroka kurt li Rojava li dar bikeve. Di vê seminerê de wê  Ebdilmecîd Xelef wekî axifger beşdar bibe.

Di roja dawî de jî wê kesên bi ser ketine bi merasimek bêne eşkere kirin.

Hevserokê Yekîtiya Rewşenbîrên Kantona Cizîrê Yûsif Kûtî axivî. Fotoyê pêşî jî ê Feryal Çolî ye di dema axaftinê de.