RIHA
Ji bo piştgiriya berxwedana Kobanî neviya Seyîd Riza, Zarîfe Polat di nav de Zarokên Ocaxên Elewî yên Dêrsimê çûn ser gundê Mahser a ser sînor û dest bi nobetê kirin.
Berxwedana gel a çûna ser sînor û girtina nobetê didome. Vê carê komek elewî li ser sînor in ku di nav de neviya Seyîd Riza Zarîfe Polat jî heye. Li ser navê koma elewiyan Velî Aytaç daxuyanî da û lanet li DAIŞ û yên piştgirî didin DAIŞ'ê kir.
Polat got: “Em wekî Zarokên Ocaxên Elewî yên Dersimê bang li hemû kesên biwijdan, di navbera însanan de cudakarî nakin û hemû baweriyên ji heq bawer dikin, li hemberî qirkirina Kobanî nebin temaşevan dikin.”
Endamê Komeleya Ocaxên Elewiyan a Dêrsimê Pîr Hayrî Sonmez got: “Ez bang li hemû gelên dinyayê dikim. Çeteya jêre DAIŞ tê gotin vê destekê ji ku digire; cesaretê ji kê digire. Em bê ku bêjin ol, ziman, nijad, mezheb hemû mirovan wekhev dibînin.”
‘KOBANÊ BU PAYTEXTA DINYAYÊ’
Herî dawî jî Hevseroka Meclisa Kantona Kobanî Eyşe Efendî ku axivî diyar kir gelê Dêrsimê yên gelek komkujî derbas kirine îro destekdayîna wan a ji bo Kobanê pir bi wate ye. Eyşe Efendî diyar kir ji bo komkujiyên li Dêrsim, Hewlêr û Mahabadê çêbûne dubare nebin kurd di nava hevkariyê de ne û wiha dewam kir: “Dilê çar parçeyên Kurdistanê bi hev re lê dide. Îro dilê kurdan li Meştenur lê dide. Em niha li vir in. Rûpelekî bi xwîna zarokên me vebûye. Li ber çavên tevahî dinyayê. Kobanî niha bû dilê çar parçeyên Kurdistanê û paytexta dinyayê.”
Piştî daxuyaniyê yên ji Dêrsimê hatin, pîrên Elewî û neviya Şêx Seîd, Zarîfe Polat ji bo Kobanê diaya Loqumê kirin û loqûm li welatiyên li ser sînor belav kirin.