Diyarname
Weşanên Do bi navê "Rênîşanêra Vegotina Kurdî" û "Şirnak Yaniyor 1992" du pirtûk derxistin.

Pirtûka "Rênîşanêra Vegotina Kurdî" (kompozîsyon, Peyvkî û Nivîskî) ji aliyê Hesen Huseyîn Denîz ve, "Şirnak Yaniyor 1992 (Şirnex Dişewite 1991)" jî ji aliyê Sertaç Dogan ve hatiye nivîsandin.

'Şirnex Dişewite' şahidiya dîrokek e

Şirnex di nav bajarên kurdan ên Bakur de xwedî ciheke taybet e bi berxwedan, bi zor û zehmetiyên ku dît. Tiştên ku di destpêka salên 1990'î de hatin jiyîn îro nayên dîtin û nifşê îro jî mimkûn e bi wê serdema nizanibe. Lê dema pirtûkek hebe li ser wê serdemê nifşê îro jî, nifşê sibê û du sibê jî dê hay ji kirênên wê demê çêbe. Û niha pirtûkek derket bi navê "Şirnak Yaniyor 1992". Pirtûk li ser wê demê ye, ji pevçûnên sala 1992'yan, êş û bedelên wê demê mînakan pêşkêş dike.

Sertaç Dogan ku carinan pênûs û kaxiz bi dest nexistiye, carinan ji mecbûrî notên xwe veşartiye, niha bi serbilindî pirtûka xwe pêşkêş dike. Pirtûka ku ji Weşanên Do derket rûpele dîrokê ya kurdan pêşkêş dike.
Ji bo kesên ku dixwazin hay ji vê parçeya dîroka kurdan hebin "Şirnex Dişewite 1992" berhemeke baş e ku bi zimanê vegotinî di heman demê de biyografyaya bajarekî jî nîşan dide. Her wiha di dawiya pirtûkê de hin fotoyên girîng jî hatine weşandin.

'Rênîşanêra Vegotina Kurdî'

Nivîskar Hesen Huseyîn Denîz pirtûkeke qalind û xweşik pêşkêş dike: Rênîşanêra Vegotina Kurdî.
Li ser kurdî çiqas pirtûk zêde bibin miheqeq dê baş be. Û her pirtûkek ku bikaribe beşeke li ser kurdî pêşkêş bike, ev başî dê zêdetir bibe. "Rênîşanêra Vegotina Kurdî" (kompozîsyon, peyvkî û nivîskî) jî yek ji wan e.
Nivîskar Denîz di pirtûkê de ji gelek aliyan li ser bikaranîna ziman û peyv û hevokên wê sekiniye.
Ji wateya girîngiya ziman bigire heta naskirina erkan, naskirina wateya peyvan, bikaranîna biwêjan, cureyên hevokan; ji di vegotinê de mijar û erka wê bigire heta cureyên ramansaziyê, taybetiyên hevokan û gelek beşên din sekiniye. Pirtûka ku ji Weşanên Do derket pencereyeke din li kurdî vedike.

- Rênîşanêra Vegotina Kurdî / Hesen Huseyîn Denîz / Weşanên Do / Rêziman / 368 rûpel
- Şirnak Yaniyor 1992 / Sertaç Dogan / Weşanên Do / Vegotin / 160 rûpel

***

Bi şertê nîşandayîna çavkaniyê her kes dikare nûçeyên Diyarnameyê bikar bîne. Bêyî nîşandayîna çavkaniyê bikaranîna nûçeyên Diyarnameyê qedexe ye.