AMED
Nûnerên 97 rêxistinên civakî yên sivîl û partiyên siyasî yên di bin sîwana KCD'ê de cih digirin, ji bo serketina berxwedana Kobanê bang kirin ku bi ruhê seferberiyê destek bê dayîn.
97 rêxistinên civakî yên sivîl û partiyên siyasî yên di bin sîwana Kongreya Civaka Demokratîk (KCD) de cih digirin, der heqê êrîşên li hemberî Kobanê de li ber avahiya KCD'ê daxuyaniyek dan çapemeniyê.
Di dema dayîna daxuyaniyê de Hevşaredarê Bajarê Mezin ê Amedê Firat Anli, Hevşaredarên Erxenî, Henê, Hezro û Yenîşehîrê, Serokê Baroya Amedê Tahîr Elçî, nûnerên Platforma KESK'ê ya Şaxan, ÎHD û Odeya Tabîban a Amedê, nûnerên rêxistinên civakî yên sivîl û partiyên siyasî yên mora wan li binê daxuyaniyê hene, amade bûn.
Daxuyanî jia liyê endamê Dîwana Serokatiyê ya KCD'ê Hîlmî Aydogdû ve hat xwendin.
Aydogdû diyar kir ku Kobanê bi komkujiyên komên barbar ên bi çekên giran re rû bi rû ye û destnîşankir ku dorpêçiya Kobanê êrîşek li hemberî hebûna gelê Kurd û ji holê rakirina destketiyên li Rojava ye. Aydogdû da xuyakirin ku li gel çekên xwe yên sivik jî Kobanê bi rojane berxwedaneke mezin nîşan dide û got, "Dilê tevahiya Kyurdan bi gelê Kobanê re rê dide. Dijderketina li van êrîşên hovane, xwedîderketina li têkoşîna bi rûmet a gelê Kobanê ne tenê wezîfe û berpirsyariya Kurdan, ya tevahiya gelên Rojhilata Navîn e. Li dijî van êrîşan piştgirîdayîna gelê Kobanê, berpirsyariyek însanî ye û parastina gelê Kobanê di heman demê de berpirsyariya exlaqî û hiqûqî ya dewletan û civaka navneteweyî ye."
BANGA LI KOALÎSYONA NAVNETEWEYÎ
Aydogdû bal kişand ser hovîtiya çeteyên DAIŞ'ê ku di peymanên mafên mirovan ên navneteweyî de jî weke sûcê li dijî mirovahiyê û sûcê şer tê pênasekirin û got, "Parastina vî gelî, berpirsyariyeke civaka navneteweyî ya ji ber belgeyên bingehîn ên wan bi xwe ye. Em bang li hêzên koalîsyona navneteweyî dikin ku dawî li dorpêçiya Kobanê bînin û ji bo pêşî li komkujiyeke gengaz bigirin, tedbîrên bi bandor ên leşkerî werbigirin."
Aydogdû da zanîn ku ew pêşniyara herêma tampon weke hewldaneke xwedî niyeteke baş nabînin û anî ziman ku ev yek wê xizmetê ji neçareseriya pirsgirêkê û tevlîhevkirina pirsgirêkê bike. Aydogdû bang li Tirkiyeyê jî kir ku helwesta xwe ya ji bo DAIŞ'ê di ber çavan re derbas bike.
'BI RUHÊ SEFERBERIYÊ EM TEVKARIYÊ LI BERXWEDANA KOBANÊ BIKIN'
Aydogdû diyar kir ku ji bo gelê Kobanê yê rastî êrîşên herî hovane tê, ew li benda hestyarî û piştevaniya di asta herî bilind de ne û got, "Roj, li dijî barbariyê xwedîderketina li gelê me yê Rojava ye ku bi berxwedana herî rewa ya dîrokê re hewl dide xwe biparêze. Em bang li tevahiya gelê xwe dikin ku ji bo serketina berxwedana Kobanê, bi ruhê seferberiyê tevkariyê bike û piştgiriya xwe nîşan bide."
Aydogdû ragihand ku banga DBP'ê ya "rawestandina jiyanê" di 2'ê Îlonê de, bangeke rast e û xwest, tevlîbûnek xurt li vê bangê were kirin.