Diyarname

Li Amedê Dibistana Seretayî ya Ferzad Kemanger ku di pêşengiya Kurdî-Der, TZPKurdî û Egîtîm-Senê de hatibû vekirin ji aliyê Serdozgeriya Komarê ya Amedê ve hat girtin.

Li Cizîrê bi navê Dibistana Seretayî ya Bêrîvanê, li Geverê Dibistana Seretayî ya Dayika Uveyş û li Amedê jî Dibistana Seretayî ya Ferzad Kemanger hat vekirin. Zarokan îro dest bi dersê kir. Lê dozgeriya dewleta tirk bêdeng nema û cih de ket nav tevgerê. Dozgeriya Komarê ya Amedê bi helwesta "bêyî destûrê vekirina saziya perwerdehiyê", "li ser navê rêxistinê sûckirin" ya li gor TCK'ê lêpirsîn da dest pê kirin. Bi destpêkirina lêpirsînê re gelek erebeyên dewletê yên zirxî, gelak TOMA û gelek polîsên hêzên çevîk, ligel polîsên sivîl dor li dibistanê girtin, mohr li deriyê dibistanê dan û dibistan girtin.

Rêveberên dibistanê, xwendekar û malbatên xwendekaran li bexçeyê dibistanê çalakiya rûniştinê dan dest pê kirin

Li Stenbolê nerazîbûn

Li ser bûyerê Meclisa Stenbolê ya HDK'ê, rêxistina HDP, DBP ya Stenbolê, Enstîtuya Kurdî ya Stenbolê li ber Lîseya Galatasaraya Stenbolê hatin ba hev, daxuyanî dan û li Amedê girtina Dibistana Seretayî ya Ferzad Kemanger şermezar kirin. Mebûsa Amedê ya HDP'ê Nursel Aydogan li vir wisa got: "Heta rê li ber perwerdehiya bi zimanê zikmakî neyê vekirin dê pirsgirêka kurd çareser nebe."

Hevserokê Enstîtuya Kurdî ya Stenbolê Sami Tan got ku bi mîlyonan zarokan heta niha bi feresata yek zimanê dewletê perwerdehî dîtiye, van zarokan nekarîne dîtinên xwe bînin ziman û di zimanê ku fêm nakin de perwerdehî dîtine. Tan diyar kir ku niha di dema ku bi zimanê xwe yi Amed, Cizîr û Geverê perwerdehî bê kirin de dewletê ev yek qebûl nekiriye, êrîş kiriye lê ewê heta dawî têkoşîna xwe ya ji bo zimanê zikmakî bidomînin.

Zumrut: Hewce bike emê li bin konan perwerdehî bibînin

Hevseroka DBP'ê ya Amedê Zubeyde Zumrut li ser girtina dibistanê got ku ew vê yekê qebûl nakin û wisa dom kir: "Hewce bike emê li bin konan vê perwerdehiyê bidin. Perwerdekar amade ne. Gelek hevalên me yên perwerdehiya bi zimanê zikmakî bidin hene. Her kes ji bo vê amade ye. Emê vê yekê ligel Navenda Xwe ya Giştî binirxînin. Ligel hemû saziyên sivîl, ligel hemû aliyên bajêr emê binirxînin û divê em çi bikin, emê wê bikin."