NAVENDA NÛÇEYAN 

Navenda Çapemeniya YPG’ê diyar kir ku çeteyên li hemberî berxwedana gel û şervanên YPG’ê têk çûne, vê carê li herêma Cezaa a li ser sînorê Başûr û di riya korîdora mirovî ya Şengalê de ye, êrîşek mezin daye destpêkirin. Navendê destnîşan kir ku di şerê ku ev 3 rojin dom dike de, heta niha 152 çete hatine kuştin 15 şervanên YPG’ê jî jiyana xwe ji dest dane. 

Navenda Çapemeniya YPGê derbarê şer û pevçûnên li herêma Cezaayê de daxuyaniyek nivîskî weşand. Di daxuyaniyê de hate destnîşankirin ku çeteyên DAIŞ’ê li hemberî sekna bi rûmet a gel û berxwedana lehengî ya şervanên YPG'ê mehkûmî têkçûnê bûne, lewre di şeva 19’ê gelawêjê de ji gelek aliyan ve bi çekên giran êrîşî Cezaa, Bêgara, Hemadan, Zerga û Arcê kirine.

Di daxuyaniyê de hate diyarkirin ku çeteyan ji aliyê Dêra Zor û Holê gelek hêz û çekên giran anîne herêmê û wisa êrîş kirine, lê li hemberî wan hêzên YPG’ê berxwedaneke bêhempa nîşan daye û wiha hate domandin: “Li hemberî van çeteyên ku nesîbê xwe ji mirovahiyê negirtine, hêzên me yên YPG’ê bi berxwedaneke bibandor bersiv dide.”

Di daxuyaniyê de bal hat kişandin ku ev 3 rojin di serî de li Cezaa û Bêgara li hemû xetan pevçûnên dijwar û di nav hev de tên jiyandin. 

‘Derbeyên mezin li çeteyan hatin xistin’

Di berdewama daxuyaniyê de hate diyarkirin ku çete dixwazin bi van êrîşan re çembera xwe ya Şengalê ku hatiye şikandin dîsa temam bikin û korîdora ewlekariyê bigirin. Di daxuyaniyê de hate gotin ku çete bi vê armancê dixwazin hemû hêrsa xwe ji gelê Kantona Cizîrê derxînin û wiha hate domandin: “Heta niha çete negihîştine armanca xwe. Di şerên derketine de, derbeyên mezin li çeteyan hatine xistin. Di van pevçûnan de hêzên me 140 çeteyên hatine kuştin, tespît kirine.”

Di daxuyaniyê de hate gotin ku di van pevçûnan de 15 şervanên YPG’ê jî jiyana xwe ji dest dane. 

Di daxuyaniyê de hate diyarkirin ku li van xetên hatine diyarkirin, şer û pevçûn bi hemû dijwariya xwe didomin.

‘Li Til Temir çalakî hate lidarxistin’

Di daxuyaniyê de hate destnîşankirin ku çeteyan xwestiye di çarçoveya heman êrîşan de li herêma Til Temir jî êrîşan pêk bînin, lê şervanên YPG’ê şevê din li hemberî wan li gundê Menecirê çalakiyek lidar xistiye. Di daxuyaniyê de hate gotin ku di navbera gundên Maqla û Arbaîn de konvoyek çeteyan hedef hatiye girtin û di encamê 2 wesayîtên ku doçka li ser in hatine rûxandin, 12 çete jî hatine kuştin. 

Daxuyanî bi van gotin hate bidawîkirin: “Çawa ku hemû êrîşên li hemberî gelê me yê Rojava û destkeftiyên wan heta niha têk çûne, wê ev êrîş jî li hemberî berxwedana lehengî ya şehîdên me, rihê fedaî û îradeya bi hêz a şervanên YPG’ê mehkûmî têkçûnê bin."

Gundê Caadê yê Kobanê hat rizgarkirin

Di vê navberê de Hêzên YPG/YPJ'ê yên li dijî çeteyên DAIŞ'ê operasyonê dimeşînin, gundê Caadê yê pêkhateyên wê Ereb e rizgar kirin.

Li gor daxuyaniyê duh danê nîvro, bi operasyona hevpar a YPG/YPJ û Tûgayên Şêmsê Şîmal, Yekîneyên Siwar Reqqa re, beşa bakur a gundê Caadê ku ji du beşan pêk tê û li başûrê Kobanê ye, ji çeteyên DAIŞ'ê hat rizgarkirin. Di operasyonê de 5 çete hatin kuştin, du çekên doçka yên çeteyan hatin rûxandin. Hat ragihandin ku li dû operasyonê çeteyên DAIŞ'ê di demeke kurt de gund terikandine û reviyane.

ANHA - Diyarname