Diyarname

Ala Fermî ya Kantona Xweser a Efrînê bi organîzasyonekê li Navenda Rêveberiya Xweseriya Demokratîk a Herêmê û li gelek avahiyên fermî ve hat daliqandin.

Rêveberiyên Hikumeta Herêma Xweser a Efrînê û Meclîsa Zagonsaz a herêmê ji bo daliqandina ala herêmê organîzasyonek li dar xistin. Organîzasyon duh bi amadebûna endamên Meclisa Zagonsaz, komîte, rêxistinên siyasî û gelek welatiyan bi meşekê  pêk hat.

Meş ji qada Azadî ber bi avahiya Saziyên Civaka Sivîl dest pê kir. Li vir di nav tilîliyên dayikan û durişmayên dilsoziya bi şehîdan re ala herêmê li ser avahiya saziyê daliqandin.

Hevseroka Meclisa Zagonsaz Hêvîn Reşîd der barê girîngiya xwedîderketina li ala herêmê de axivî û got ku ev al nîşaneya azadiya gel e. Piştre endamê Tevgera Civaka Demokratîk Behcet Berekat der barê geşedanên dawî yên herêmên Rojava û tevahî Sûriyeyê de axivî û destnîşan kir ku pêwîst e hemû welatî xwedî li Rêveberiya Xweseriya xwe derkevin û destkeftiyên şoreşê ku bi saya YPG’ê hatine bidestxistin biparêzin.

Paşê beşdaran berê xwe dan avahiya Rêveberiya Xweseriya Demokratîk û li vir jî ala herêmê li ser avahiyê daliqandan. Piştî wê Seroka Hikûmeta Herêmê Hêvî Mustefa axaftinek kir û ala herêmê li welatiyan pîroz kir. Hêvî di axaftina xwe de bal kişand ser pêwîstiya hevgirtina welatiyan ji bo berxwedana li hemberî êrîşên çeteyan.

Organîzasyon bi lîstina govendê bi dawî bû.

ANHA