STENBOL

Dadgeha Stenbolê têkildarî  îtiraza Ajansa Nûçeyan a Firat (ANF) a ji bo astengiya li hemberî malpera wê bê rakirin biryar da, qedexeya li ser ANF’ê rabû, parêzerê ANF’ê Ramazan Demîr got: “Bêhuqûqî û kêfiyeta bi salan e didome, bi vî awayî bi dawî bû.”

Malpera înternetê ya www.firatnews.com ya ji sala 2005'an ve bi du zaravayên Kurdî (Kurmancî-Soranî) û Tirkî, Îngilîzî, Erebî û Farisî weşanê dike, di sala 2011’an de bi 36 malperên înternetê re bi biryareke bi torbe hat astengkirin. Di vê navberê de navnîşanên din ên domaîn ên girêdayî ANF’ê jî bi heman awayî hatin astengkirin.

Wekîlê Navenda Ajansa Nûçeyan a Firat a navenda wê li Hollanda ye Ramazan Demîr 23’ê Hezîrana borî serî li Dadgeha Cezayê Giran a Nobedar a Stenbolê dabû. Demîr xwestibû astengiya li hemberî ANF’ê bê rakirin.

Bi ANF’ê re di nava 36 malperan de navendalekolîn.com, pajk-online.com, roj.tv, rojaciwan.com, komunar.net û denge-mezopotamya.com jî hatin astengkirin. Dadgehê di biryara ku îro da diyar kir ku xala qanûna mijara gotinê ji meriyetê hatiye rakirin û îtiraza ANF’ê di cih de hat dîtin.

Demîr bibîr xist ku ANF jî di nav de bi sedan malperên Kurdî bi salane bi vî awayî tên qedexekirin û wiha dewam kir: “Dadgehê li gor sedemên îtiraza me biryareke di cih de daye. Bêhuqûqî û kêfiyeta bi salan didome bi dawî bû.”