HEWLÊR
Serokê Herêma Kurdistanê Mesûd Barzanî ji bo parastina axa Herêma Kurdistanê banga alîkariyê li pêşmergeyên teqawîtbûyî û welatiyên Kurdistanê kir ku piştgiriya pêşmergeyan bikin.
Serokê Herêma Kurdistanê daxuyaniyekî nivîskî belav kir û banga alîkariyê li pêşmergeyên teqawitbûyî û gelê kurd kir. Barzanî di daxuyaniya xwe de wiha got: “Ji ber rewşa niha li ser sînorên Herêma Kurdistan û Iraqê derketî holê, ji bo parastina welatî û destkeftiyên gelê Kurdistanê, pêwîst e hemû alî bi berpirsyarî piştgirî û alîkariya pêşmergeyên Kurdistanê û hêzên asayîşa Herêma Kurdistanê bikin.”
Mesûd Barzanî di peyama xwe de wiha dibêje: “Ez daxwazê ji hemû pêşmergeyên qehreman ên di qonaxa teqawitbûyî de ne dikim ku bi armanca piştgiriya ji bo hêzên pêşmerge û xwe amadekirina ji bo her egerekê, pêwendî ligel cih û baregehên xwe yên berê bikin ku di nav de xizmeta gel û welatê xwe dikirin. Ji bo vê armancê pêwîst e wezareta pêşmergeyan rê û rêbazên kêrhatî bafirînin û erkê wan nîşan bikin.”
Barzanî banga alîkariyê li gelê Kurdistanê jî kir ku li gor karînên xwe alîkariya pêşmergeyan bikin û wiha got: “Bi piştgiriya Xwedê û îradeya we, hêzên pêşmergeyan amadene xaka Kurdistanê biparêzin û siberojekî geş li pêşiya gelê Kurdistanê ye.”
Piştî vê banga Serokê Herêma Kurdistanê Mesûd Barzanî, saziya pêşmergeyên teqawitbûyî diyar kirin ku ew amadene xaka Kurdistanê biparêzin.
Berî niha Koma Civakên Kurdistanê (KCK), PKK, PYD, YPG-YPJ û KODAR’ê jî diyar kiribûn ew bi hemû hêza xwe ve amadene ku xaka başûrê Kurdistanê ji êrîşên çekdarên Dewleta Îslamî li Iraq û Şamê (DAIŞ) biparêzin. Duh jî endamê Komîteya Rêveber a PKK’ê Mûrad Karayilan ji bo ANF’ê diyar kiribû ku gerîlayên wan amade ne bi hemû hêza xwe başûrê Kurdistanê biparêzin. Karayilan bang li PDK û YNK’ê kiribû û wiha gotibû: “Gerîlla amade ne ku biçin Kerkûk û Şengalê biparêzin.”