Diyarname

Kovara bi navê Nûpelda he sê mehan carekê ji aliyê komek kurdîhezan ve tê derxistin. Kovarê herî dawî hejmara xwe ya payîza 2013’yan ragihand ber destê xwendevanên xwe.

Nûpelda ku sê mehan carekê li ser xeteke olî bi kurdî weşanê dike, hejmara xwe ya 14’an derxist. Lijneya weşanê ya kovarê dibêje, “derdê me ne tenê derxistina kovarekê ye. Her wiha em li pey derxistina kovareke bi kalîte ne jî. Em bi vê yekê bêtir serê xwe diêşînin” û di her hejmara xwe de dikin ku kovareke baş pêşkêşî xwendevanên kurdî bikin.

Li ser vê rêgezê di vê hejmarê de jî gelek nivîsên cur bi cur cih girtine. Di vê hejmarê de Aqil Mihacir du nivîs nivîsîne. Ji wan yek li ser "Geşt û gereke li ser qada felsefeyê" ye û ya din jî di bin navê "Helbesta 'Eşqa Welat' a Evdirrehîm Zapsû" ye.

Her wiha M.Xalid Sadinî û Tehsîn Îbrahîm Doskî li ser jiyan û berhemên "Şêx Muşerrefê Xunokî", Abdulhadî Tîmurtaş jî li ser seyda Abdulcelîl Candan bi navê "Min gelek bêriya te kiriye", Yakup Aykaç jî "Egirdekfiroş" nivîseke nivîsiye. Nivîskar Ahmet Demir jî nivîsa xwe "Di kurdî û îngilîzî de hin bêjeyên nêzform û nêzwate" rêz kiriye. Ji bilî van jî gelek nivîs, helbest û wergerên din di kovarê de cih girtine.

Ji bo têkilî û xwestinê:

http://nupelda.net/