Rêxistinên sivîl ên civakî yên Hezexê ji bo gelê Rojava konê alîkariyê vedan. Hezexiyan diyar kirin ku divê li tevahiya Kurdistanê û li derveyî welat xebatên bi vî rengî bên destpêkirin û alîkarî bên berhevkirin.
 
Li navçeya Hezexê ya Şirnexê rêxistinên sivîl ên civakî bi armanca piştgiriyê bidin gelê Rojava kon vedan û di donê de ji bo gelê rojavaya Kurdistanê alîkariyê berhev dikin.
 
Kon di bin pêşengiya Komeleya Piştgirî û Alîkariya Gelê Hezexê (ÎHYADER) de li ber Şaredariya Hezexê hate vekirin; BDP, Egîtîm-Sen, komele û saziyên din jî piştgirî didin.
 
JI BO ROJAVA BANG
 
Hezexiyan destnîşan kir ku bi şer û pevçûnên li Sûriyeyê bi hezaran welatî ji cih û warên xwe koçber bûne, lê hê jî gelê me yê Rojava ji ber ew qas şer û komkujiyan jî, dîsa cihê xwe terk nake û di avakirina pergala xwe ya xweseriya demokratîk de têkoşîna xwe didomîne.
 
Hezexiyan bal kişand ser rewşa rovayê Kurdistanê û diyar kirin ku divê gelê kurd, bi taybetî jî gelê Bakur xwedî li gelê Rojava derkeve û bi her awayî piştgiriyê bide welatiyên xwe.

Wan bang li hemû bajarên Kurdistanê û kurdên li metrepolan dijîn kirin û xwest her kes li herêma ku lê dimîne, kampanyaya piştgiriyê bide destpêkirin, konên alîkariyê vede.
 
Welatiyan eşkera kir ku ev konên alîkariyê di heman demê de, jiyana komînal û demokratîk ya bi hev re ye û xwestin ev xebat di demildest pêk werin.

Ji DÎHA'yê hatiye girtin