Amed

Şaredarê Efrînê Îbrahîm Ebdurrehman û heyeta pêre çûn serdana Şaredarê Bajarê Mezin ê Amedê Osman Baydemîr. Li ser xebatên şaredariyê axaftin hatin kirin û zanîna li ser xebatên şaredariyên li hev hatin parvekirin.

Şaredar Baydemî li şaredariyê pêşwazî li heyetê kir. Baydemîr dilxweşiya xwe ku wan li Amedê pêşwazî dikin anî ziman û li ser bajêr, xebatên şaredariyê di navbera wan de dan û standin çêbûn. Baydemîr got ku Efrîn semboleke girîng e û diyar kir ku ewê bi şaredariya Efrînê re di nav piştgiriyê de bin, çi ji destê wan bê dê texsîr nekin.

Piştî sohbetê ji aliyê Serokatiya Daîreya Stratejiyê ya Şaredariya Bajarê Mezin ve birîfeke li ser xebatên şaredariyê û bajêr pêşkêşî mêvanan kir. Di birîfê de ligel Baydemîr, Wekîla Şaredar Hafize Îpek, Sekreterê Giştî yê GABB'ê Ahmet Ertak, Şaredarê Yenişehîrê Selim Kurbanoglu û rayedarên Şaredariya Bajarê Mezin amadebûn.

Şaredarê Efrînê Îbrahîm Ebdurrehman ji ber mêvandariyê sipasiyên xwe pêşkêşî Baydemîr kir. Ebdurrehman got ku Efrînê koçek mezin girtiye nava xwe, pêdiviya wan gelek bi xuret, derman û amûrên însanî heye û xwest gavek zûtir deriyê însanî li Efrînê bê vekirin.

Heyet çû serdana Azadiya Welat 

Heyeta ku roja 20'ê mehê mêvanê Baydemîr bû, piştre çû serdana saziyên din ên kurdan. Heyet îro jî çû serdana rojnameya Azadiya Welat û li vê dere gazina xwe ji çapemeniya kurd kir ku bi têra xwe cih nade Rojava. 

Baydemîr 80 hezar TL kom kir 

Dîsa di çarçoveya kampanyaya berhevkirina pereyan a ji bo dermanan de Şaredarê Bajarê Mezin ê Amedê Osman Baydemîr jî ket nava hewldanan. Baydemîr li bankeyê hesabek vekiribû û ji der û dorê 80 hezar TL pere berhev kir. Baydemîr ev dekonta pereyan ji bo Rojava dermanan bikirin û bişînin teslîmê amadekarên kampanyayê kir.