Diyarname
Yekîtiya Weşangerên Tirkiyeyê (TYB) ku her sal ji bo piştgirî û destekkirina têkoşîna azadiya fikir û ramanê xelatan dide sazî û nivîskaran, xelatên sala 2024'an bi merasîmekê da.

TYB ev 30 sal in di çend waran de vê xelatê dide. TYB'ê îsal Xelata Weşanxaneyê da Weşanxaneya Weqfa Îsmaîl Beşîkcî, Xelata Nivîskar da romanivîskarê navdar Ahmet Umit u Xelata Taybet jî ji bo Açik Radyoyê da Omer Madra.

Merasima xelatdayînê li Beyogluya Stenbolê li Locaya Weşanên Yapi Kredî, bi beşdariya gelek rewşenbîr û nûnerên saziyên sivîl pêk hat. Her wiha di dema merasîmê de rapora derheqê binpêkirinên mafên azadîya ramanê a sala 2024'an de jî ku ji hêla heman saziyê ve tê amadekirin, hate eşkerekirin. Di raporê de gelek qedexekirinên pirtûkên weşanxaneyên kurdan jî cih digire.

'EM HER SAL DIBÊJIN BILA YA DAWÎ BE'
Serokê TYB'ê Kenan Kocaturk di merasimê de axivî, bal kişand ser binpêkirinên di warê azadiya fiki û ramanê de û got, "Dema em xelatê didin em her sal dibêjin bila ev a dawî be, lê her em dibînin binpêkirinên mafê azadiya fikir û ramanê çêdibin. Heta ev binpêkirin hebin emê jî têkoşîna xwe bidomînin.

'QEDEXEYA PIRTÛKAN LI BER AZADIYA RAMANÊ ASTENG E'
Li ser navê Weşanxaneya Weqfa Îsmaîl Beşîkçî, Kondînatorê Weşanxaneya Weqfê Davut Ozalp xelat girt. Ozalp piştî xelatgirtinê sipasiya TYB'ê û Serokê TYB'ê Kocaturk kir û got, "Ji roja Weqfa Îsmaîl Beşîkçî hatiye avakirin ev 12 sal in ligel hemû berhemên Beşîkçî, xebatên kurdî, li ser dîrok û wêjeya kurdan di gelek warî de, dîsa li ser ermen, suryanî û komên din me pirtûk çap kirine. Di salên dawî de hin guherîn çêbibin jî mixabin hê pirtûk têne qedexekirin, bi taybetî pirtûkên weşanxaneyên kurdan. Herî dawî di dawiya sala 2024'an de sê pirtûkên me yên ku 7 sal berê hatibûn çapkirin jî têde em rastî lîsteyeke dirêj a qedexeya pirtûkên weşanxaneyên kurdan hatin. Qedexeya pirtûkan li hemberî azadiya fikir û ramanê asteng e; heta ev astengî hebe dê têkoşîna ji bo azadiya fikir û ramanê jî bidome. Em di vî warî de çi ji destê me tê emê bikin."

'LI SER NAVÊ HEMÛ NIVÎSKARÊN RASTÎ ZORDARIYÊ TÊN DIGIRIM'
Nivîskar Ahmet Umît jî di dema girtina xelata xwe de got, "Romaneke min a bi navê 'Patasana' heye. Diruşma wê wisa ye: 'Di serdema zaliman de ez alçaxekî bûm'. Çima wisa dibêje? Ji ber ku dema zalim zalimtî dikin ew bêdeng dimîne. Ev çîrok 2700 sal berê li bajarê Karkamiş derbas dibe. Îro mixabin dinya careke din ketiye nava serdema hovîtî. Ji bo em jî wisa nebin, em mecbûr jin ji neheqiyê re bêjin na, ji şaşiyan re bêjin bise, li hemberî xirabiyê jî bisekinin. Îro TYB'ê ev xelat da bin, ez sipasiya wan dikim. Ez vê xelatê li ser navê hemû nivîskar û rewşenbîrên li Tirkiye û li dinyayê ji ber nivîsa xwe rastî zordariyê tên digirim.

Kordînotarê Weşanên Weqfa Îsmaîl Beşîkçî Davut Ozalp li ser navê weqfê xelat girt.