ALÎ GULER - HAGEN
Li rojavayê Kurdistanê, komkujiya El Nûsra ya li dijî sivîl û zarokan li her deverên ku kurd lê dijîn tê şermerzarkirin. Lîstikvanên SV Ararat ku yek ji klûba herî kevin a futbolê ya kurdên li Almanyayê ye, di maça dostaniyê ya bi SSV Hagen a alman re, bi armanca şermezarkirina komkujiya li Rojava banda reş girêdan û pankart vekirin. Berdevkê Klûbê Mehmet Sari bang li gelê kurd kir ku li her devera ku lê dijîn, komkujiya li Rojava şermezar bikin.
Tîma SV Ararat a li Gevelsberg a ser bi bajarê Almanya Ennepentalê di sala 1990'î de ji aliyê ciwanên kurd ve hat damezrandin. Araratê, duh li hemberî tîma alman SSV Hagen maçeke dostaniyê lîst û di vê maçê de komkujiya li Rojava şermerzar kir. Lîstikvanên tîmê banga reş girê dan û bi pankarta bi nivîsa "Em qirkirina li rojavayê Kurdistanê şermezar dikin" derketin maçê. Berî maçê ji bo kesên jiyana xwe ji dest dane, deqeyek rêz hat girtin.
'DIVÊ KURD SPORT JI VÊ RE PÊŞENGIYÊ BIKE'
Berdevkê Klûba Futbolê ya SV Ararat Mehmet Sari da xuyakirin ku ji bo ew balê bikşînin ser komkujiya li Rojava û raya giştî ya alman di vî warî de agahdar bikin, wan çalakiyeke wiha pêk anîne.
Sari diyar kir ku divê tu kurd li hemberî vê komkujiyê bêdeng nemîne û got, "Rojava birîna me ya xwîn jê tê ye. Lê îro haya kesî ji wê derê tune ye. Dev ji almanan berdin, haya kurdan zêde ji wir tune ye. Ji bo em bala mirovan bikşînin ser rewşê, em jî bi pankart û girêdana banda reş derketin maçê."
Mehmet Sari bang li kurdan kir ku li her devera ku lê dijîn çalakiyan bikin û got, "Ji destê me ev tê. Dibe ku tiştekî biçûk e, lê li gorî me watedar û girîng e. Em bi dil û can li gel Rojava ne. Divê ev baş were fêmkirin. Me li vê derê bala ciwanên ewropî yên ji bo temaşekirina maçê hatine, kişandin. Eger tevahiya tîmên kurd vê bikin, emê xwe bigihînin bi hezaran mirovan û dengê xwe bidin bihîstin."
Sari diyar kir ku divê El Nusra û çeteyên din ên bi navê Îslamiyetê vê komkujiyê dikin werin teşhîrkirin û got, "Tu pêwendiya pêkanînên van bi Îslamiyetê re nîn e. Divê were teşhîrkirin. Diviyabû Yekîtiya Sportvanên Kurd "Kurd Sport" a berî çend mehan li Ewropayê ava bû, pêşengî bikira. Diviyabû klûbên kurd ên li Ewropayê, ji bo çalakiyeke bi vî rengî pêşniyar bikira. Lê mixabin ji wan jî tu deng derneket. Me jî biryar da ku nerazîbûna xwe bi vî rengî bînin ziman. Em hêvîdarin tîmên din ên futbolê yên ev helwesta me dîtine, wê çalakiyên bi heman rengî pêk bînin."
Sari bang li her kesî kir ku di warê madî û manewî de alîkariyê bidin Rojava û got, "Bêdengî ne însanî ye." Sari ragihand ku eger komkujî dewam bike, ewê bi pankart û banda reş derkevin hemû maçên lîgê yên di meha rezberê de dest pê bikin.
SV Ararat ku di sala 1990'î de li Gevelsberg a ser bi bajarê Almanya Ennepentalê ji aliyê ciwanên kurd ve hat damezrandin, ev pênc sal in di Kreis Liga A de dilîze. Klûb xwedî du tîman e. Di nava tîmê de li gel kurdan, lîstikvanên alman, îtalî, azerî û tirk jî hene.
Ji ANF'ê hatiye girtin
**
REKLAM:
Hejmara 7-8 a Dîwar li benda we ye.
Ji bo agahiyên berfirehtir:
.jpg)
.jpg)
