NAVENDA NÛÇEYAN
Partiya Yekîtiya Demokratîk (PYD) di 39'emîn salvegera projeya Kembera Erebî ku ji aliyê rejîma Baas ve hatibû pêkanîn û kurd ji cih û warên wan hatibûn kirin de, diyar kir ku ewê li dijî hemû projeyên nîjadperest têbikoşin û xeta neteweya demokratîk pêş bixin.
PYD'ê bi minasebeta salvegera pêkanîna projeya Kembera Erebî ku di 24'ê pûşpera 1974'an de dest pê kiribû û di çarçoveya polîtîkayên nîjadperest de kurdên rojavayê Kurdistanê ji cihên wan hatibûn derxistin û li şûna wan ereb hatibûn bicîhkirin, daxuyaniyek nivîskî weşand. Di daxuyaniyê de hate bibîrxistin ku vê projeya ku ji aliyê Mihemed Teleb Hîlal ve hatibû amadekirin, guhertina demografiya herêmên kurdan armanc dikir.
Di daxuyaniyê de hate destnîşankirin ku rêvebiriya Partiya Bees di 24'ê pûşpera sala 1974'an de biryara bi hejmara 521 derxist û bi vê biryarê proje hate destpêkirin. Di daxuyaniyê de hate diyarkirin ku li sînor ji Dêrikê heta Serêkaniyê li ser erdnîgariyek 350 kîlometre dirêj û 10 kîlometre jî fireh, 35 gundên ereban hatine avakirin.
Di berdewama daxuyaniyê de bal hat kişandin ku proje hişmediya nîjadperest a erebî ku pêhateyên din ên civaka Sûriyê nas nake dide nîşandan û dixwest pêkhateyên din, bi erebkirinê tune bike.
Di daxuyaniyê de hate bibîr xistin ku li hemberî van plan û projeyan niha li rojavayê Kurdistanê li ser bingeha netewa demokratîk û sîstema xweseriya demokratîk, şoreşek civakî tê jiyandin û wiha hat domandin: "Emê bi hemû derfetên xwe hewl bidin ku çanda demokrasiyê û hêmanên jiyana hevbeş pêş bixin, em ê bi hêzên azadîxwaz ên civaka Sûriyê re ji bo rakirina bermahiyên hemû pirojeyên nîjadperest û kiryarên çewisandinê, hemû arîşe û pirsgirêkên ku rejîma Baas li pey xwe hiştine ji holê rakin da ku her kes bigihîje mafên xwe yên rewa."
Di dawiya daxuyaniyê de hate gotin ku PYD wê ji bo jiholêrakirina hemû projeyên nîjadperest wê têkoşîna xwe bidomîne û ev tişt hatin gotin: "Her wiha ji bo ku Suriye bibe welatê me hemûyan, em ê li ser bingeha biratiya gelan, ji bo herkes bigihîje mafên xwe yên rewa, têkoşînê dewam bikin."
Ji ANHA hatiye girtin
