STENBOL
Parlementerê BDP'ê yê Stenbolê Sirri Sureyya Onder di êrîşa polîsan de ji ber kapsula gazê birîndar bû û rakirin nexweşxaneyê. Di encama mudaxeleya polîsan de gelek kes jî birîndar bûn û birîndarên giran jî hene.
Li Parka Seyranê ya Taksîmê ji bo parastina parkê û darên lê Mebûsê BDP'ê Sirri Sureyya Onder jî têde komek kes li parkê ev du roj in nobetê digirin. Îro jî komê xwest daxuyanî bidin çapemeniyê lê polîsan êrîşeke tund nîşan da û di encamê de Mebûsê BDP'ê yê Stenbolê Sirri Sureyya Onder bi kapsula gaza çavsotîner ji milê xwe birîndar bû û bi sedyeyê ew rakirin Nexweşxaneya Taksîmê. Ji bo encama Onder bê zelalkirin li benda encama MR ne. Her wiha rojnameger Ahmet Şik jî ji serê xwe birîndar bû.
Di encama mudaxeleyê de gelek kes hatin binçavkirin, gelek kes birîndar bûn û birîndarên giran jî hene. Di dema êrîşa polîsan de mebûsê CHP'ê Sezgin Tanrikulu, lîstikvan Gonca Vuslateri, Riza Kocaoglu, Aylin Aslim jî ji gaza çavsotîner para xwe girtin.
Hikumeta Tirkiyeyê dixwaze Parka Seyranê ya Taksîmê xira bike, li wê derê hem AVM hem jî Kişleya Leşkerî ya ku 100 sal berê hebû ji nû ve çêbike. Hawirparêz jî dixwazin parkê biparêzin û wekî niha park tenê ji bo seyrana gel bê bikaranîn.
Duh serê sibê şefeqê wesayîtên şaredariyên ketibûn parkê ku daran ji kokê de rakin, lê Onder dîsa xwe avêtibû pêşiya wan û ew dabûn rawestandin.
Digel ku dadgehê hê destûra xirakirina parkê nedaye jî bêyî destûr hikumet û Şaredariya Stenbolê (ku di destê AKP'ê de ye) dixwaze parkê xira bike.
BDP: Bila berpirs ji peywirê bêne girtin
BDP'ê li ser bûyerê daxuyaniyeke nivîskî weşand û xwest berpirsên vê yekê ji peywirê bêne girtin û der barê wan de lêpirsîn bê vekirin.