Diyarname
Serokdewletê Venezuelayê Hugo Chavez ku ev demeke dirêj bû ji ber qansêrê dihat dermankirin şeva 5'ê adarê wefat kir.
 
Chavez di 2'yê reşemiya 1999'an de bi sedî 56'î dengên gel hatibû desthilatdariyê û piştî wî li Amerîkaya Latîn desthilatdariyên çepgir rabûbûn ser piyan, hatibûn desthilatdariyê.

Hugo Chavez di 28'ê tîrmeha 1954'an de li Sabaneta ya Barinas a Venezuelayê hat dinyayê. Ew wekî zarokê malbateke ji çîna karker hat dinê, demekê bû sûbay. Wî di destpêka salên 1980'yan de Tevgera Şoreşger a Bolivar-200 (MBR-200) da dest pê kirin. Di sala 1992'yan de li hemberî hikumeta Serokê Dewletê Carlos Andres Perez derbeyeke li dar xist lê bi ser reket. Piştî 2 salan girtî ma Tevgera Komara Pêncemîn ava kir û di sala 1999'an de hat desthilatdariyê. Pêre zagona Venezuelayê guhart û di sala 2000'î de careke din hat hilbijartin. Di vê serdemê de mîsyona Bolîvarî da nasîn, konseyên komînal ava kir, koperatîfên ku karker bi rê ve dibin saz kir. Her wiha reforma axê çêkir, dest danî ser hin saziyên sanayî û ew kirin malên dewletê.

Ew li ser rêgeza "Sosyalîsta ji bo Sedsala 21'ê" û Bolîvarî dimeşiya. Li welatê xwe reformên Şoreşa Bolîvarî da meşandin.
Ew di sala 2006'an de careke din di hilbijartinê de bi ser ket û heta 2012'yan de serokdewletî kir.
Di 5'ê rezbera 2012'yan de bi sedî 54 dengên gel careke din hat ser kar lê vê carê ne hilbijartinê, nexweşiyê derbes lêda.

Wî di vê dema serokdewletiya xwe de neyartiya DYA'yê kir, bi welatên wekî Kuba, Koreya Bakur, Îran, Belarus û Sûriyeyê re têkiliyên dostanî danî.

Chavez di sala 2011'an de bi nexweşiya lezyonê ket û ji bo dermankirinê çû Kubayê. Pêşî nexweşiya wî ber bi paşî ve çû lê di sala 2012'yan de ji ber qansêr careke din di laşê wî de derket, rewşa tenduristiya wî ber bi xirabiyê ve çû.
Chavezî vê carê nekarî li ber qansêrê ber xwe bide û êvara 5'ê adara 2013'yan wefat kir.

Welatê wî Venezuela li dinyayê pêncemîn welat e ku xwediyê petrolek zêde ye. Venezuela rojê 3,2 mîlyon varîl petrolê derdixe, ji vê mîlyon û nîv varîl petrolê difroşe DYA'yê.