Amed
44 partiyên siyasî û rêxistinên sivîl ên civakî yên Amedê têkildarî komkujiya Roboskiyê hate 28'ê berfanbarê dê gelek bername û çalakiyan li dar bixin.

Koordînasyona ji 44 partiyên siyasî û rêxistinên sivîl ên wekî KCD, BDP, ÎHD, DDKD, ESP, OSP, KADEP, EMEP, Koma Diyalogê ya Dîcle Firat, Însiyatîfa Azadî, HDK û MAZLUMDER jî di nav de li Mêvanxaneya Şaredariya Bajarê Mezin a Amedê têkildarî komkujiya Roboskiyê de civîna çapemeniyê li dar xistin.

Hevseroka BDP'a Amedê Zubeyde Zumrut, Serokê Giştî yê DDKD'ê Îmam Taşçier, Cîgirê Serokê Giştî yê KADEP'ê Lutfu Baksî û nûnerên saziyan tevlî civînê bûn. Li ser navê saziyan Serokê Giştî yê DDKD'ê Îmam Taşçier daxuyanî xwend û wiha got: "Divê her kes xwedî çalakiyên şermezarkirina komkujiya Roboskiyê pêk tên derbikevin. Em wekî rêxistinên kurdistanî ji bo careke din 'komkujiyên wekî Roboskiyê pêk neyên' hatin cem hev. Ji bo Roboskî neyên ji birîkirin û tenê neyê hiştin em dê ji îro pê de dest bi çalakî û bernameyan bikin."

Taşçier ragihand ku heta salvegera komkujiyê yanî heta 28'ê berfanbarê dê gelek bername û çalakiyan li dar bixin û wiha axivî: "Em dê di 27'ê berfanbarê de li Amedê bi girseyî meşekê li dar bixin û daxuyaniyê bidin çapemeniyê. Em hemû saziyên kurdan dê dengê xwe bilind bikin."

Taşçier axaftina xwe wiha berdewam kir: "Roboski qirkirinek e. Divê kurd li hemberî vê qirkirinê bêdeng nemînin. Divê dengê xwe bilind bikin û bibin yek."
Taşçier da zanîn ku divê li her aliyê Tirkiyeyê welatî dengê xwe bilind bikin û bertekan nîşanî komkujiyê bidin.

Hevseroka BDP'a Amedê Zubeyde Zumrut jî diyar kir ku komkujiya Roboskiyê pirsgirêka hemû kesên dibêjin ez "mirov im" e û wiha got: "Di civîna serê sibê de gelek pêşniyar û nêrîn derket holê. Em dê ji Dortyola Baxlarê hate Parqa Koşuyoluyê meşekê li dar bixin û daxuyaniyê bidin çapemeniyê. Em dê di 28'ê berfanbarê biçin Roboskiyê. Dê ji her aliyê Tirkiyeyê nûnerên saziyan û welatî bên Roboskiyê. Divê li her bajarê Tirkiyeyê welatî xwedî li vê komkujiyê derbikevin."