Diyarname

Hevgirtina Rewşenbîrên Rojavayê Kurdistanê (HRRK) rojên 25-26'ê vê mehê de 4'emîn Kongreya xwe li dar xist. Di kongreyê de pirsgirêkên hevgirtinê û rojeva ku kurd niha têde ne hatin nîqaşkirin. Hevgirtinê di dawiyê de komîteyeke karîger ku ji 9 kesan pêk dihat ava kir û her wiha encamnameya xwe jî weşand. Di na komîteya karîger a hevgirtinê de Ehmed Huseynî, Helîm Yûsiv, Reşîd Heso, Roza Husên, Hesen Ebdullah, Welîd şêxo, Husên Omer, Bavê Narîn, Yûsif Xalidî heye. Ji nav van jî Hesen Abdullah ji bo Serokatiya Komîteyê, Welîd Şêxo jî ji bo cigirtî hat hilbijartin.

Ev komîte ji niha û pêde dê dest bi xebatan bike.

Her wiha hevgirtinê encamnameya xwe jî weşand. Em wê encamnameyê radigihînin we: "

Encamnameya Kongreya 4'an a Hevgirtina Rewşenbîrên Rojavayê Kurdistanê

Li bajarê Bielefeld ê almanyayê û piştî rawestandina kar û barê hevgirtinê ji ber sedemên cuda, di 25 û 26.01.2014'an de, kongreya çaran ya Hevgirtina Rewşenbîrên Rojavayê Kurdistanê lidarket.

Damezirandina hevgirtinê bixwe bersiveke rasterast bû ji bo 12'ê Adara 2004'an, her wiha dengvedana wijdan û hêviyên miletê me bû. Ji ber ku rewşa îro nêzîkî wê rewşê ye ya ku piştî 12'ê Adarê hatibû holê, komîteya kargêr û hejmareke ji endaman xwestin ku kar û barên xwe berdewam bikin û layiqî rewşa vê qonaxê û pirsên wê bin. Ji ber vê komîteya kargêr hate avakirin û vexwendineke vekirî ji bo hemû rewşenbîrên rojavayê Kurdistanê di çapemeniyê de belav kirin, da ku beşdarî kongireya 4'an bibin û giyanê serhildana Adarê vejînin. Bi awayekî ku bibin dengê berxwedana miletê xwe dijî zordariya rêjîma sûrî. Her wisa bi miletê xwe re beşdarî xwepêşandan û çalakiyên ji bo azadî, dadmendî, wekhevî û rûmetê bibin. Nexasim ku bi sedan ji zarokên miletê me di riya parastina xak û gelê xwe de, diji hêzên tarî şehîd ketin. Beşdarên kongireyê bi berfirehî li ser xalên di rojevê de û li ser rêbaza xwe danûsitendin. Beşdar di wê baweriyê de bûn ku pêdivî bi piştgiriya destkeftiyên miletê me heye, ku bi xêra keda xebatkarên me û xwîna şehîdên me hatine holê. Wisa jî girîngiyeke mezin dan rola jina kurd û beşdariya wê ya çalak di destnîşankirina qedera gelê me de. Her wiha pêdiviya bi beşdariya hemû rewşenbîrên rojavayê Kurdistanê di kar û barê bi hev re hate piştrastkirin. Ji ber wê deriyê vê hevgirtinê ji bo hemû rewşenbîran, dîtin û nerînên wan çi bin bela bibin, vekirî ye. Li gor rêbaza hevgirtinê û armancên wê, ev hevgirtin platformeke rengînî ye û li ser bingeha danûstendin, rêzgirtina dîtinên cihê, pejirandina hev, hemêzkirina dîtinên rexneyî û nirxên giştî hatiye avakirin. Ev yek jî me dajo ber wê berpirsiyariyê ku em bi hev re gavan ber bi armancên xwe yên hevbeş ve bavêjin, asta gotara xwe ya rewşenbîrî bilind bikin û di çarçoveya parastin û pêşxistina zimanê xwe de van nirxan pêş ve bibin.

Di dawiya kongireyê de ev pêşniyaz û biryar hatin girtin:

1- Hem li Amedê û hem li Hewlêrê kongre û civîn bêne lidarxistin. Eger di nava şeş mehan an salekê de ev civîn pêk hatin, wê komîte amadekariya kongreyeke giştî û awarte li Qamişlo bê kirin.

2- Pêşdebirina karê hevgirtinê di warê ragihandinê de "aktîfkirina malpera fermî ya hevgirtinê û rûpelên wê yên di warê medya civakî de.

3- Avakirina têkiliyan bi dezgeh û der û dorên biyanî re.

4- Xurtkirina danûstendin û têkiliyên endamên hevgirtinê yên ku li yek welatî dimînin û lidarxistina çalakî û şevên wêjeyî û çandî. Di riya amadekirina planeke karkirinê û bi erêkirin û alîkariya komîteya kargêr ya ku di vê kongireyê de hate hilbijartin."

** 

Nûçeyên eleqedar:

- Kongreya HRRK'ê dest pê kir 

- HRRK bi kongreya xwe dixwaze xwe çalaktir bibe