KOBANÎ

Koçberên ji Reqa, Girê Spî û Minbicê ku li dibistanên bajarê Kobanî dimînin, di nava şert û mercên zehmet de dijîn; ew dixwazin vegerin warên xwe.

‏Bi destpêkirina sala nû ya xwendinê re, zext li ser malbatên koçber zêde bûne da ku ji polên dibistanan derkevin û cih ji xwendekaran re bê vekirin. Ev biryar fikir û metirsiyeke mezin di nava koçberan de çêkiriye, ji ber ku tu cih û stargehên din ên alternatîf ji wan re nehatine peydakirin.

‏Ev malbat ji ber kêmasiya alîkariyên mirovî, nebûna xizmetguzariyên bingehîn mîna av, kehrebe û dermanan, di rewşeke pir xerab û bê hêvî de ne. Piraniya wan zarok û kal û pîr in ku nikarin mesrefên kirêkirina xaniyan peyda bikin.

'EM DI NAV ZEXTÊN GIRAN DE NE'
Koçbera bi navî Sîham Mislim ku di dibistana bajarê Kobanî de dimîne got; "Ev 10 meh in em di nava zehmetiyên giran de derbas dijîn ku heta niha bê av û kehrebe dijîn. Em di nava zextên pir giran de ne."
Sîham Mislim  diyar ku ew jî dixwazin wekî her kesî bijîn û dibêje: “Divê ji bo me jî çareserî werin dîtin.”

'ZAROKÊN ME JI XWENDINÊ Jî BÊPAR IN'
Ehmed Mihemed Elî ku ji Girê Spî ye, diyar dike ku ew û malbata xwe du caran koçber bûne û dibêjet: “Em ji Girê Spî koçberî bajarê Reqayê bûn, piştre dema ku şer li bajarê Reqayê dest pê kir koçberî bajarê Kobanî bûn û me di nava dibistanên bajarê Kobanî de cih girt. Dibistan ji bo xwendinê ne, ne ji bo rûnişkandinê. Zarokên me ji perwerdeyê bêpar mane û mafê wan ê herî bingehîn ku di dibistanê xwe de fêrî zimanê xwe bibin, tune ye.”
Elî dibêje "Em dixwazin vegerin ser mal û milkên xwe" û van lê zede dike: "Daxwaza me ew e ku ji nû ve ewlahî vegera da ku em koçber vegerin ser malên xwe û bi jiyaneke aram jiyan bikin.”

Zaroka bi navê Bişra Mislim ji bajarê Reqayê ye daxwaza xwe wisa anî ziman: “Em dixwazin vegerin cih û warê xwe da ku em jî dibistanên xwe de perwerde bibin wekî her zarokekî ku xwendina xwe dike.”

‏Koçber bang li saziyên mirovî û cihên peywendîdar dikin ku destwerdaneke lezgîn ji wan re bê kirin û çareseriyeke guncaw ji bo wan were dîtin. Divê stargehên wan peyda bikin berî ku bên derxistin û di nava kolanan de bimînin.

ANHA