Diyarname
Weşanxaneya Nûbiharê, bi pirtûkek nû ya çîrokên gelêrî pirtûkxaneya kurdî dewlemendir dike. Nivîskar Yasemîn Elban, çîrokên ku ji zaroktiya xwe ve li ser axa kom kirine, di bin navê “Qehreman û Qeyteran” de anî cem hev.
Weşanxaneya Nûbiharê ku di warê çand û wêjeya kurdî de xwedî kedeke mezin e, vê carê bi berhemeke taybet a ji pênûsa jinekê derket pêşberî xwendevanan. Çîrokên ku ji aliyê nivîskar Yasemîn Elban ve hatine hûnandin, wekî destegulek ji çîrokên gel hatin weşandin.
Bîra Gelêrî ji Gundê Çorsênê heta Agirî û Mêrdînê
Bi hezar salan e kurdan bi çîrokan jiyan, huner û şîretên xwe ragihandine nifşên nû û ew çîrok heta niha hatine. Ji van çîrokan hin niha ketine nava vê pirtûkê.
Yasemîn Elban ev berhem bi kedeke mezin berhev kiriye; çîrok, çîrçîrok û meselokên ku di zaroktiya xwe de li gundê Çorsênê ya Tetwana Bîtlîsê ji devê kal û pîran bihîstiye, bi berhemên çîrokbêjên herêmên Agirî, Mêrdîn, Êlih, Gimgim, Êdir û Melazgirtê re kiriye yek.
Di Rûpelên Pirtûkê de Cîhana Xeyal û Rastiyê
Pirtûka ku bi navê “Qehreman û Qeyteran: Destegulek ji Çîrokên Gel” derketiye, xwendevanan dibin nava cîhaneke ku xeyal û rastî lê têkel dibin. Hin taybetmendiyên berêka çîrokên di pirtûkê de ev in:
“Qehremanên Qenc”, “Jinên Jîr”, “Paşayên Bêbext” ku heryek ji wan dibe dersek û şîretekê dihewîne.
Bi vê bîra kûr a civakî re, pirtûk ji bo xwendevanên ku dixwazin bi bîra çanda xwe re bibin yek, derfeteke mezin e û ev berhema hêja di nav refên Nûbiharê de li benda xwendevanên xwe ye.
******************************