Diyarname
Nivîskarê malpera me Helîm Yûsiv bi romaneke nû û taybet li pêş berî xwendevanên xwe ye; "Jiyan Herêmeke Qedexekirî Bû". Roman ji Weşanên Sar derket. Taybetiya vê romanê ew e ku nivîskar bixwe serlehengê vê romanê ye. Di romanê de mirov dikare dîroka Helîm Yûsiv bi xwe û parçeyek ji jiyana kurdên Rojava jî bibîne.

Kurdên Rojava bi qasî kurdên parçeyên din, belkî ji wan zêdetir zor û zehmetî dîtin. Ji biçûk heta mezinan hema her kes rastî vê tehdeyê, zor û zehmetî hatin û di nav rewşeke wisa de ber xwe dan. Yek ji wan jî nivîskar Helîm Yûsiv bi xwe bû. Helîm Yûsiv ku ev bi ser 30 salan re ye karê nivîskarî dike, vê carê berê xwe daye jiyana xwe; ew jiyana ku li Amûdê dest pê kiriye û li Almanyayê didome.

'EZ PALA XWE DIDIM SERPÊHATIYÊN XWE'
Yûsiv heta niha ji bo çîrokên xwe, romanên xwe gelek karakter afirandibûn, niha ew bi xwe serkarekterê romana xwe ye. Wî di romana xwe ya nû "Jiyan Herêmeke Qedexekirî Bû" de berê xwe daye jiyana xwe. Li ser vê yekê Yûsiv ji bo me wisa got, "Ev roman ne wekî hemû romanên heta niha min nîvisandine. Li şûna ez berê xwe bidim jiyana kesên din û bi hûrbînî wan di romana xwe de bi cih bikim, min pala xwe daye serpêhatiyên xwe û jiyana xwe ya nivîskariyê."

'SINDOQA XWE YA REŞ VEDIKIM'
Yûsiv ji bo me dibêje, "Ez sindoqa reş a jiyana xwe li ber xwendevanan vedikim" van lê zêde dike, "Yekem car e ez ê xwe nespêrim xeyal û fantaziyên xweşik ên afirandinê, ji wê bêhtir ez ê behsa xwe, malbata xwe, heval û dostên xwe û kulîsên nivîskariyê, bikim. Ez ê bi destê xwendevanên xwe bigrim û wan derbasî nav bûyerên jiyana xwe bikim. Jiyana min mîna malekê bû, ku derî û pencereyên wê şikestîbin û ji çar aliyan ve fîzefîze ba û bahozan rê nede xwediyê malê ku carekê tenê be jî ew bi dilekî rehet razê. Pêdivî bi bûyer û kesên xeyalî namîne, gava jiyan bi xwe ji xeyalê biwêdetir be."

'TEVNEK TAYBET E'
Nivîskar Helîm Yûsiv di dawiyê de wisa dibêje, "Hemû li ser jiyana Helîm Yûsiv e. Ne roman e sedî sed, her tişt wekî bîranîn e lê di kirasê romanê de ye. Tevnek taybet e di navbera bîranîn û romanê de ye, cara yekê ye ez tiştek wisa dinivîsim heta niha."

'DÎROKA NÊZ A SÛRIYEYÊ XUYA DIKE'
Akademîsyen Umran Aran ku edîtoriya romanê kiriye, romanê wisa dinixine, "Mirov dibîne ku Helîm Yûsivê mirov û Helîm Yûsivê nivîskar ji hev nayên veqetandin; nivîskariyê bi awayekî bihêz karîgerî li jiyana Yûsivî kiriye û bûyerajî vê jî rast e. Lewma mirov di vê berhemê de paşxane û binaxeyên berhemên din ên nivîskarî jî dibîne; ev ne tenê serpêhatiyên wî, serpêhatiyên berhemên wî ne jî. Helîm Yûsiv wekî mirovekî ji hin kêliyên nexweş ên jiyana xwe bi wêrekî nivîsîne ku ev yek otantîkbûneke taybetî dide berhemê."
Urman bi van gotinan nirxandina xwe temam dike, "Di nav biranînên nivîskar de diroka nêzîk a kurden Sûriyeyê jî xuya dike: qedexe, tirs, şer, rev, windabûn û hewildana ji nû ve destpêkirinê."

- Jîyan Herêmek Qedexekirî Bû / Helîm Yûsiv / Weşanên Sar / Roman / 2026 / 288 rûpel