Amed
Hevserokê Giştî yê BDP'ê Selehattîn Demîrtaş civîna vê hefteyê li ber Girtîgeha Amedê pêk anî û xwest Serokwezîr Erdogan li hemberî berxwedana gel ya li hemû bajaran bêdeng nemine û bi lezgînî gava çareseriyê bavêje. Demîrtaş got ku, gelê kurd duh li ber xwe da, îro li ber xwe dide û dê sibê jî li ber xwe bide. Demîrtaş got: "Em ne çûyîna Mehmet Ocalan a ji bo Îmraliyê, em dixwazin Ocalan bê Amedê."
Hevserokê Giştî yê BDP'ê Selehattîn Demîrtaş civîna koma BDP’ê vê hefteyê li ber Girtîgeha Amedê pêk anî. Di civîna koma BDP'ê de bi 10 hezaran kes amade bûn. Dema Demîrtaş li ber Mala Şînê ya Dîcleyiyan diaxivî helîkopter bê navber di ser girseyê re bi nizmî difiriyan. Demîrtaş got ku, girtiyên ku 49 rojin ketine greva birçîbûnê ji bo mafê xwe yê demokratîk û rewa ketine grevê û wiha dom kir: "Tu kes bi kêfî xwe birçî nahêle. Ji ber ku zilmek tê meşandin, înkar û îmha heye ciwanên kurd bedena xwe dane ber mirinê. Ji bo ku şer, kuştin, binçavkirin û girtin bi dawî bibin ciwanên kurd li girtîgehan bedena xwe dane ber mirinê. Ji bo tecrîd û îşkence bi dawî bibe hevalên me ketine grevê. Daxwazên wan di heman demê de daxwazên me ne. "
DEMÎRTAŞ BANG LI ERDOGAN KIR
Demîrtaş bang li Serokwezîrê Tirkiyeyê Erdogan kir û xwest Serokwezîr li hemberî vê berxwedana gel ya li hemû bajaran bêdeng nemîne û bi lezgînî gava çareseriyê bavêje. Demîrtaş xwest ev berxwedana gel ya li hemû bajarên kurd lê dijîn bibîne û gava çareseriyê bavêje. Demîrtaş destnîşan kir ku, mafê her kesên ku rastî zilmê tê heye ku li ber xwe bide û têkoşînê bide. Demirtaş wisa got: "Li hemû Şirnexê dikan girtî ne û kolan vala ne. Li Colemêrgê û navçeyên wê, li Wan û hemû navçeyên wê, li Amed û hemû navçeyên wê tev girtî ne. Gelê me dernetine kolanan. Li Edene, Mêrsîn, Stenbol û Îzmîrê hemû tax û kolanên ku kurd lê dijîn kolan vala ne û dikan girtî ne. Welatiyên kurd dibêjin ger ku zarokên me ji bo me amade ne canê xwe bidin, em jî dê neçin ser kar û dikanên xwe venakin. Îro ev peyam hate dayîn. Gel îro jî û dê sibê jî vê helwestê bide nîşan."
‘GER KU BERXWEDAN TUNE BE ÇARESERI JÎ TUNE YE’
Demîrtaş anî ziman ku, ew destûr nadin ciwan xwe bikin qurbana desthilatdariyê û wiha berdewam kir: "Ger ku berxwedan tune be çareserî jî nabe. Em li ber Zindana ku Mazlum têde li ber xwe daye bang dikin. Heta ku em pêşeroja xwe ya azad, welatê xwe yê azad nexwazin çareserî pêk nayê. Em ji hikumetê û dewletê bersivek zelal dixwazin. Em dibêjin ji bo li girtîgehê mirin cênebin bi lezgînî Serokwezîr bersivê bide. Em dixwazin derbarê Îmralî, ziman de bi lezgînî bersiva çareseriyê bide. Em ne ji bo şantajê ji bo çareseriyê bang dikin. Em ne tenê îro, em duh, îro û dê sibê jî li kolanan bin. Em niha li ber girtîgeha ku Mazlûm lê li ber xwe daye bang dikin. Em li ber girtîgeha ku di serdema Serokwezîr de jî zilm berdewam dike bang dikin. Ev girtîgeh ne tenê girtî li ber xwe didin, di heman demê de mîlyon li derdora wê li ber xwe didin."
'ÎRO LI HER DERÊ BERXWEDAN HEYE DÊ SIBÊ JÎ LI HER DERÊ BERXWEDAN HEBE'
Demîrtaş da zanîn ku, îro li hemû taxên kolanên Amedê berxwedan heye û wiha dawî li axaftina xwe anî: "Li her derê gelê me li ser piyan û di nava berxwedanê de ye. Ger ku gelê me li her derê ji bo çareseriyê daketibe kolanan, divê teqez Serokwezîr êdî gavê çareseriyê bavêje. Em ji ber vê sekna gelê xwe ku naxwaze hevalên me di zindanan de jiyana xwe ji dest bidin pîroz dikin. Îro em li ber zindana Amedê bi tevlîbûna 10 hezaran civîna koma xwe pêk tînin. Em ji hemûyan re serketinê dixwazin."
Demîrtaş bal kişand ser hevdîtinên bi Ocalan re û got;"Em ne çûyîna Mehmet Ocalan ji bo Îmraliyê, em dixwazin Ocalan bê Amedê."