Maxime Azadî

Li bajarê Kobanî yê rojavayê Kurdistanê gelê kurd dest danî ser hemû saziyên hikumeta rejîma Sûriyeyê. Rayedarên kurd ragihandin ku wan bi aramanca ku şerê li Sûriyeyê negihe Kurdistanê tedbîreke wiha girtine. Serokê PYD’ê Salih Mislim ji bo ANF’ê axivî û ev yek piştrast kir.

Komîteyên Parastina Gel ên ji aliyê gelê Rojavayê Kurdistanê ve hatiye avakirin, li Kobaniyê dest danî ser hemû saziyên dewleta Sûriyeyê. Serokê PYD’ê Salih Mislim vê nûçeyê piştrast kir.

Hat ragihandin ku di dema gel dest danî ser rêveberiya bajarê Kobaniyê, tu bûyerên tundiyê neqemiye. Serokê Partiya Yekîtiya Demokratîk (PYD) Salih Mislim ji bo ANF’ê axivî û ragihand ku saziyên dewletê yên li Kobaniyê bi temamî ketine destê Komîteyên Parastina Gel. Rêberê PYD’ê, diyar kir ku li hin deverên Efrînê jî bûyerên wiha diqewimin û got; “Gel xwe bi xwe bi rê ve dibe.”

Mislim destnîşan kir ku ji bo desthilatiya li Sûriyeyê bi dest bixin, şer tê kirin û got; “Li Şamê teqîn çêdibin, pevçûn dijwar dibin. Gel dixwaze li vê derê rêveberiyê bixe destê xwe şerê di navbera rejîmê û Artêşa Azad a Sûriyeyê de heyê li Kurdistanê asteng bike.”

Mislim ragihand ku divê kurd li her deverên Kurdistanê û Sûriyeyê dijîn, divê xwe biparêzin û got; “Li vir dijminahiya tu kesekî tune ye. Lê ji bo şer û pevçûn negihin Kurdistanê gel rêveberî bi dest dixe.”

Mislim ragihand ku li herêmê tu hêzên leşkerî tune ne û Komîteyên Parastina Gel jî bi hêzên emniyetê re neketine nava pevçûnan û got; “Li cihên ku gel dixin destê xwe, ji xebatkarên saziyan re dibêjin ‘hûn mêvanê me ne, ger hûn bixwazin, li vir bimînin em ê we biparêzin, lê em êdî vir bi rê ve bibin.”

Mislim diyar kir ku heta niha li duyemîn bajarê herî mezin ê Sûriyeyê ku hejmareke zêde ya kurdan lê dijîn, tu pevçûnek neqewimiye. Mislim got ku Artêşa Azad a Sûriyeyê neketiye herêmên ku kurd lê dijîn û destnîşan kir ku dibe pevçûn bigihin Helebê jî.

Rêberê PYD’ê pevçûnên li Sûriyeyê dê dijwar bibin û got; “Em niha ne li benda destwerdaneke leşkerî ya derve ne. Ji ber ku şert û mecên ji bo vê yek tune ne.”

Hate zanîn ku dibe kurd li herêmên din ên rojavayê Kurdistanê rêveberiyê bi dest bixin. Kurd ji adara 2011'an ve dixwazin pêkhatiyeke demokratîk ji xwe re ava bikin û heta niha ji bo vê yekê çalakiyên aştiyane li dar dixin. Kurdan li vir dibistanên bi zimanê zikmakî vekirin, meclisên gel û Komîteyên Parastina Gel ava kirin. Nêzî 3 mîlyon kurd li rojavayê Kurdistan û Sûriyeyê dijîn û ev yek dike sedî 15’yê şêniya Sûriyeyê.

Li hemberî hemû komplo û êrîşên dewletên mêtînger û bi taybet jî Tirkiyeyê, kurdên li Sûriyeyê, di bin banê konseyekê de kom bûn û yekîtiya xwe ava kirin.

Herêma ku PYD, hêza Meclisa Gel û partiya sîwan ya Meclîsa Neteweyî ya Kurdan lê bi bandor in, di 9-10’ê Tîrmehê di civînek ya li Hewlêrê de biryar girtibûn ku hêzên xwe bikin yek. Hevpeyman di çavdêriya Serokê Herêma Federal ya Kurdistanê Mesûd Barzanî de hatibû îmzekirin. Her du meclisên ku bûyerên tundî û bê aramiya Rojavayê Kurdistanê mehkum dikin, bi rêbazên aştiyane banga hilweşandina rejima Baas ya 40 sal e li ser desthilatdariyê ye kirin.

Ji ANF'ê hatiye girtin