Diyarname
Piştî nivîskar û rewşenbîr Mehmed Emîn Bozarslan mir, gelek saziyan peyam belav kirin,xemgîniya xwe anîn ziman û ji bo malbatê sersaxî xwestin.
Va ne ew peyam:

SEROKÊ HERÊMA KURDISTANÊ NÊÇÎRVAN BARZANÎ
Nêçîrvan Barzanî: Ji bo koça dawî ya nivîskar, lêkolîner û welatparêzê hêja Mehmed Emîn Bozarslan, sersaxiyê didim malbata wî ya birêz û hemû rewşenbîrên Kurdistanê. Canê wî şa be. Seyda Bozarslan bi xizmet û berhemên xwe yên binirx, roleke mezin ji bo parastin û bi pêşxistina ziman û wêjeya Kurdî lîst. Şopa wî dê her tim di bîra me de zindî bimîne.

DEM PARTÎ:
- Çinarê edebiyata Kurdî Mehmed Emîn Bozarslan koça dawî kir. Gelê kurd dê wî jî û keda wî ya mezin a ji bo zimanê Kurdî jî ji bîr nake.
Serê me û gelê me sax be.

KOMELEYA WÊJEKARÊN KURD
- Komeleya Wêjekarên Kurd: Bi xemgîniyeke kûr em hîn bûn ku kedkarê mezin ê ziman, dîrok û wêjeya Kurdî, nivîskar û lêkolînerê hêja Mihemed Emîn Bozarslan li sirgûnê, li bajarê Uppsalaya Siwêdê koça dawî kiriye. Mihemed Emîn Bozarslan ne tenê nivîskarek bû; ew di tariyên herî reş de birca ronahiyê ya zimanê Kurdî bû. Bi xebatên xwe yên li ser Mem û Zîna Ehmedê Xanî, bi Alfabeya xwe ya Kurdî, bi çîrokên xwe yên keda gel û bi lêkolînên xwe yên dîrokî, wî bingeha wêjeya modern a Bakurê Kurdistanê xurt kir.”
Keda wî, dê rêya wêjeya Kurdî her dem ronî bike.

SOZDER
- Komeleya Lêkolînên Çand Dîrok û Wêjeya Devkî (SOZDER): Ew di heman demê de seydayekî mezin û şopdarê ronahiyê bû. Wî bi pênûsa xwe, bi taybetî bi xebatên li ser Ehmedê Xanî, Mem û Zîn û elfebeya Kurdî, di dil û hişê her Kurdekî de cih girtiye. Şopên murekkeba pênûsa wî îro di her maleke Kurdî de dibiriqin û mîrateya wî ya zengîn wê bibe ronahî ji bo nifşên nû.
 Wekî Komeleya Lêkolînên Çand Dîrok û Wêjeya Devkî (SOZDER), em vê windahiya mezin a neteweyî wekî windahiya xwe dibînin. Em ji bo malbata wî, dost, heval û hemû gelê Kurd sersaxiyê dixwazin. Cihê wî bihişt be, serê gelê me sax be.

***

Nûçeyên eleqedar:

- Nivîskar û rewşenbîrê Mehmed Emîn Bozarslan mir

-- Parçeyek ji dîroka kurdan: Mehmed Emîn Bozarslan 90 salî ye

Vîdeoyek: